ಬೆಳಗಾಂವಿ – ಒಂದು ಅವಲೋಕನ
ಸಹ್ಯಾದ್ರಿ ಪರ್ವತ ಶ್ರೇಣಿಗಳ ತಪ್ಪಲಿನಲ್ಲಿರುವ ಬೆಳಗಾವಿಯು ಅನೇಕ ನೈಸರ್ಗಿಕ ಅದ್ಭುತಗಳಿಗೆ ನೆಲೆಯಾಗಿದೆ. ಉತ್ತರ ಕರ್ನಾಟಕದ ಐತಿಹಾಸಿಕ ಪಟ್ಟಣವಾಗಿರುವ ಬೆಳಗಾವಿಯನ್ನು ಹಿಂದೆ ಬೆಳಗಾಮ್ ಎಂದು ಕರೆಯಲಾಗುತ್ತಿತ್ತು, ಇದು ಮಲೆನಾಡು ಪ್ರದೇಶದಲ್ಲಿದ್ದು ವರ್ಷವಿಡೀ ಹಚ್ಚ ಹಸಿರಿನಿಂದ ಕೂಡಿರುತ್ತದೆ. ಬೆಳಗಾವಿಯು ಅನೇಕ ಐತಿಹಾಸಿಕ ಸ್ಥಳಗಳು ಮತ್ತು ದೇವಾಲಯಗಳಿಗೆ ನೆಲೆಯಾಗಿದೆ.
ಬೆಳಗಾಂವಿಯಲ್ಲಿ ನೋಡಬೇಕಾದ ಸ್ಥಳಗಳು
ಬೆಳಗಾವಿಯು ನಿಸ್ಸಂದೇಹವಾಗಿ ಸಂಪೂರ್ಣ ಕುಟುಂಬಕ್ಕೆ ಪರಿಪೂರ್ಣ ತಾಣವಾಗಿದೆ. ಐತಿಹಾಸಿಕ ನಗರವು ಜಲಪಾತಗಳು, ದೇವಾಲಯಗಳು, ಕಾಡುಗಳು, ಅಣೆಕಟ್ಟುಗಳು ಮತ್ತು ಟ್ರೆಕ್ಕಿಂಗ್ ಬೆಟ್ಟಗಳನ್ನು ಹೊಂದಿದೆ.
ಬೆಳಗಾವಿಯಲ್ಲಿ ಭೇಟಿ ನೀಡಬೇಕಾದ ಐತಿಹಾಸಿಕ ಸ್ಥಳಗಳು
ಕೋಟೆ ನಗರ ಎಂದೂ ಕರೆಯಲ್ಪಡುವ ಬೆಳಗಾವಿಯು ಭವ್ಯವಾದ ಇತಿಹಾಸವನ್ನು ಹೊಂದಿದೆ. ಕಿತ್ತೂರಿನ ರಾಣಿ ರಾಣಿ ಚೆನ್ನಮ್ಮ ಬ್ರಿಟಿಷರೊಂದಿಗೆ ನಡೆಸಿದ ಯುದ್ಧದಿಂದಾಗಿ ಪ್ರಸಿದ್ಧಿ ಪಡೆದ ಕಿತ್ತೂರು ಬೆಳಗಾವಿಗೆ ಸೇರಿದೆ. ಇದು ಭಾರತೀಯ ಸ್ವಾತಂತ್ರ್ಯ ಹೋರಾಟದ ಪ್ರಮುಖ ಸ್ಥಳಗಳಲ್ಲಿ ಒಂದಾಗಿದೆ.
ಬೆಳಗಾವಿ ಕೋಟೆ
12 ನೇ ಶತಮಾನದಲ್ಲಿ ಸ್ಥಳೀಯ ರಟ್ಟಾ ದೊರೆಗಳಿಂದ ನಿರ್ಮಿಸಲ್ಪಟ್ಟ ಬೆಳಗಾವಿ ಕೋಟೆಯು ತನ್ನ ಗತ ಇತಿಹಾಸದ ಭವ್ಯತೆ ಮತ್ತು ವೈಭವವನ್ನು ಹೇಳುತ್ತದೆ. ಇಲ್ಲಿನ ಪ್ರವೇಶದ್ವಾರದಲ್ಲಿರುವ ದುರ್ಗಾ ದೇವಿ ಮತ್ತು ಗಣೇಶನ ಅದ್ಭುತ ದೇವಾಲಯಗಳು ನಿಮ್ಮನ್ನು ಮಂತ್ರಮುಗ್ಧಗೊಳಿಸುತ್ತವೆ. ಬೆಳಗಾವಿಯ ಅತ್ಯುತ್ತಮ ಮಸೀದಿಗಳಲ್ಲಿ ಸಫಾ ಮಸೀದಿ ಎಂದು ಕರೆಯಲ್ಪಡುವ ಕೋಟೆಯೊಳಗೆ ಇದೆ. ಇಲ್ಲಿನ ಗುಮ್ಮಟಗಳು, ಕಮಾನುಗಳು ಮತ್ತು ಮಿನಾರ್‌ಗಳು (ಗೋಪುರಗಳು) ಇಂಡೋ-ಸಾರಾಸೆನ್ ಮತ್ತು ಡೆಕ್ಕನ್ ಶೈಲಿಯ ವಾಸ್ತುಶಿಲ್ಪದ ವಿಶಿಷ್ಟ ಸಮ್ಮಿಳನವಾಗಿದೆ.
ಕಿತ್ತೂರು
ಐತಿಹಾಸಿಕ ಪಟ್ಟಣವಾಗಿರುವ ಕಿತ್ತೂರು ಭಾರತೀಯ ಸ್ವಾತಂತ್ರ್ಯ ಹೋರಾಟದ ಇತಿಹಾಸದಲ್ಲಿ ಮಹತ್ವದ ಸ್ಥಾನವನ್ನು ಹೊಂದಿದೆ. ರಾಣಿ ಚೆನ್ನಮ್ಮಗೆ ಹೆಸರುವಾಸಿಯಾಗಿರುವ ಕಿತ್ತೂರು ಬೆಳಗಾವಿಯಲ್ಲಿ ಭೇಟಿ ನೀಡಲೇಬೇಕಾದ ಸ್ಥಳವಾಗಿದೆ. ಕಿತ್ತೂರು ರಾಣಿ ಚೆನ್ನಮ್ಮಾಜಿಯು ಸ್ವಾತಂತ್ರ್ಯಕ್ಕಾಗಿ ಮಾಡಿದ ತ್ಯಾಗ ಬಲಿದಾನವನ್ನು ಸುವರ್ಣ ಅಕ್ಷರಗಳಲ್ಲಿ ಕೆತ್ತಲಾಗಿದ್ದು ಕಿತ್ತೂರು ಕೋಟೆ ಮತ್ತು ಅರಮನೆಯು ಬೆಳಗಾವಿಯ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿದೆ.
ಹಲಸಿ
ಬೆಳಗಾವಿಯ ಅತ್ಯಂತ ಹಳೆಯ ಪಟ್ಟಣಗಳಲ್ಲಿ ಒಂದಾದ ಹಲಸಿಯು ದೇವಾಲಯಗಳಿಗೆ ಹೆಸರುವಾಸಿಯಾಗಿದೆ. ಕ್ರಿ.ಶ 345 ಮತ್ತು 550ಗಳ ನಡುವೆ ಹಲಸಿಯು ಬನವಾಸಿ ಕದಂಬರ ಎರಡನೇ ರಾಜಧಾನಿಯಾಗಿತ್ತು. ಇಲ್ಲಿನ ಮುಖ್ಯ ದೇವಾಲಯಗಳೆಂದರೆ ಭೂವರಾಹ ನರಸಿಂಹ ಮತ್ತು ಶಂಕರ ನಾರಾಯಣ ದೇವಾಲಯಗಳು. ಇಲ್ಲಿ ನೀವು ಗೋಕರ್ಣೇಶ್ವರ ದೇವಸ್ಥಾನ, ಸುವರ್ಣೇಶ್ವರ ದೇವಸ್ಥಾನ, ಕಾಳೇಶ್ವರ ದೇವಸ್ಥಾನ, ಹಟಕೇಶ್ವರ ದೇವಸ್ಥಾನ, ಜೈನ ಬಸದಿ, ಕಪಿಲೇಶ್ವರ ದೇವಸ್ಥಾನ, ಮತ್ತು ಜಾಮಿಯಾ ಮಸೀದಿಗಳನ್ನು ನೋಡಬಹುದು.
ರಾಜಹಂಸಘಡ
ರಾಜಹಂಸಗಡ ಕೋಟೆಚಿತ್ರ ಕೃಪೆ: ನಿತಿನ್ ಜಂಬಗಿ
ಬೆಳಗಾವಿಯಿಂದ ದಕ್ಷಿಣಕ್ಕೆ ಕೇವಲ 20 ಕಿಮೀ ದೂರದಲ್ಲಿರುವ ರಾಜಹಂಸಘಡ ಪುರಾತನ ಕೋಟೆಯಾಗಿದೆ. ಇದು ಸಮುದ್ರ ಮಟ್ಟದಿಂದ 1000 ಮೀಟರ್ ಎತ್ತರದಲ್ಲಿದೆ. ಇಲ್ಲಿ ನೀವು ಸುತ್ತಮುತ್ತಲೂ ಅದ್ಭುತವಾದ ಪ್ರಕೃತಿ ವೈಭವವನ್ನು ಕಾಣಬಹುದು. ಇಲ್ಲಿನ ಯೆಲ್ಲೂರುಗಡ್ ಗ್ರಾಮವು ಕಲ್ಮೇಶ್ವರ, ಲಕ್ಷ್ಮಿ, ದತ್ತಾತ್ರೇಯ, ಪರಮೇಶ್ವರ, ಮತ್ತು ಚಾಂಗಲೇಶ್ವರಿಯಂತಹ ಅನೇಕ ಪರಂಪರೆಯ ದೇವಾಲಯಗಳಿಗೆ ನೆಲೆಯಾಗಿದೆ.
ಇಲ್ಲಿನ ಐತಿಹಾಸಿಕ ಪ್ರಾಮುಖ್ಯತೆಯಿರುವ ಇತರ ಸ್ಥಳಗಳೆಂದರೆ ಭೀಮಗಡ ಕೋಟೆ, ತೋರಗಲ್, ಸಪ್ತಸಗ, ಪರಸಗಡ ಕೋಟೆ, ನಿಪ್ಪಾಣಿ ಮತ್ತು ಬೆಳವಾಡಿ.
ಬೆಳಗಾವಿಯಲ್ಲಿರುವ ಪ್ರೇಕ್ಷಣೀಯ ಸ್ಥಳಗಳು
ಗೊಡಚಿನಮಲ್ಕಿ ಜಲಪಾತ (ಗೋಕಾಕ್)
ಗೊಡಚಿನಮಲ್ಕಿ ಜಲಪಾತವು ಗೋಕಾಕ್‌ನಿಂದ ಕೇವಲ 16 ಕಿಮೀ ದೂರದಲ್ಲಿದೆ ಮತ್ತು ಗೋಕಾಕ್-ಕೊಣ್ಣೂರು ರಸ್ತೆಯ ಪಶ್ಚಿಮಕ್ಕೆ ಇದೆ. ಇಲ್ಲಿ ನೀವು ಎರಡು ಜಲಪಾತಗಳನ್ನು ಕಾಣಬಹುದು. ಈ ಎರಡು ಜಲಪಾತಗಳು ಮಾರ್ಕಂಡೇಯ ನದಿಯಿಂದ ಉದ್ಭವವಾಗುತ್ತದೆ. ಒಂದು ಜಲಪಾತವು 25 ಮೀಟರ್ ಎತ್ತರದಿಂದ ಧುಮುಕಿದರೆ ಇನ್ನೊಂದು ಜಲಪಾತವು 18 ಮೀಟರ್ ಎತ್ತರದಿಂದ ಧುಮುಕುತ್ತದೆ.
ಗೋಕಾಕ್ ಜಲಪಾತ
ಗೋಕಾಕ್ ಜಲಪಾತಚಿತ್ರ ಕೃಪೆ: ಸಿದ್ದಾರ್ಥ್ ಚೋನ್ನಾಡ್
ಬೆಳಗಾವಿಯಿಂದ 60 ಕಿಮೀ ಮತ್ತು ಗೋಕಾಕ್‌ನಿಂದ 10 ಕಿಮೀ ದೂರದಲ್ಲಿರುವ ಗೋಕಾಕ್ ಜಲಪಾತವು ತನ್ನ ಅದ್ಭುತ ಮತ್ತು ಭವ್ಯವಾದ ನೋಟಗಳಿಗೆ ಹೆಸರುವಾಸಿಯಾಗಿದೆ. ಈ ಜಲಪಾತವು ಮಳೆಗಾಲದ ನಂತರದ ಸಂಪೂರ್ಣ ವೈಭವದಿಂದ ಕಂಗೊಳಿಸುತ್ತದೆ. ಮತ್ತು ಸಾಕಷ್ಟು ಪ್ರವಾಸಿಗರು, ಛಾಯಾಗ್ರಾಹಕರು ಮತ್ತು ಪ್ರಕೃತಿ ಪ್ರಿಯರನ್ನು ಆಕರ್ಷಿಸುತ್ತದೆ. ಗೋಕಾಕ್ ಜಲಪಾತದ ಬಗ್ಗೆ ಒಂದು ಕುತೂಹಲಕಾರಿ ಸಂಗತಿಯೆಂದರೆ, ಭಾರತದಲ್ಲಿ ಮೊದಲು ವಿದ್ಯುತ್ 1887 ಅನ್ನು ಉತ್ಪಾದಿಸಿದ ಸ್ಥಳ ಇದಾಗಿದೆ.
ಸದಾ ಫಾಲ್ಸ್ ಟ್ರೆಕ್
ವಜ್ರಪೋಹ ಜಲಪಾತಚಿತ್ರ ಕೃಪೆ: ವೆಂಕಟೇಶ್ ಯರಧಾಳ್
ದಟ್ಟವಾದ ಕಾಡು, ಬಂಡೆಗಳು ಮತ್ತು ತೊರೆಗಳ ಮೂಲಕ ಹಾದುಹೋಗುವ ರೋಮಾಂಚಕ ಮತ್ತು ಅದ್ಭುತವಾದ ಚಾರಣವು ಜಲಪಾತ ಮತ್ತು ಕಣಿವೆಯ ಕೆಲವು ಅದ್ಭುತ ನೋಟಗಳನ್ನು ನೀಡುತ್ತದೆ. ಗೋವಾದ ಗಡಿಗೆ ಸಮೀಪವಿರುವ ಪಶ್ಚಿಮ ಘಟ್ಟಗಳಲ್ಲಿನ ಒಂದು ಆಫ್‌ಬೀಟ್ ಜಲಪಾತ. ಟ್ರೆಕ್ ಸಂಯೋಜಕರನ್ನು ಅವಲಂಬಿಸಿ ಈ ಮಾರ್ಗದರ್ಶಿ ಚಾರಣವು 8 ರಿಂದ 18 ಕಿಮೀ ವರೆಗೆ ಬದಲಾಗುತ್ತದೆ.
ಕಾಂಗ್ರೆಸ್ ಬಾವಿ, ಭೀಮಗಡ ವನ್ಯಜೀವಿ ಅಭಯಾರಣ್ಯ, ವಜ್ರಪೋಹ ಜಲಪಾತ, ಬೆಳಗಾವಿ ಗಾಲ್ಫ್ ಕೋರ್ಸ್, ಘಟಪ್ರಭಾ, ಮಲಪ್ರಭಾ ಅಣೆಕಟ್ಟು, ನವಿಲುತೀರ್ಥ, ಧೂಪದಾಲ್, ಬರಪೇಡೆ ಗುಹೆಗಳು ಮತ್ತು ರಾಕಾಸ್ಕೋಪ್ ಇತ್ಯಾದಿಗಳು ನೀವು ಭೇಟಿ ನೀಡಲೇ ಬೇಕಾದ ಸ್ಥಳಗಳಾಗಿವೆ.
ಬೆಳಗಾವಿಯ ದೇವಾಲಯಗಳು ಮತ್ತು ಇತರ ಧಾರ್ಮಿಕ ಸ್ಥಳಗಳು
ಬೆಳಗಾವಿಯನ್ನು ದೇವಸ್ಥಾನಗಳ ಪಟ್ಟಣ ಎಂದೂ ಕರೆಯುತ್ತಾರೆ. ಇಲ್ಲಿ ಪ್ರಾಚೀನ ಮತ್ತು ಪಾರಂಪರಿಕ ದೇವಾಲಯಗಳಿವೆ.ಇಲ್ಲಿ ಹಿಂದೂ ದೇವಾಲಯಗಳು, ಚರ್ಚ್, ಗುರುದ್ವಾರ, ಮಸೀದಿಗಳು ಮತ್ತು ಬಸದಿಗಳು (ಜೈನ ಸ್ಮಾರಕಗಳು) ಸಮಾನವಾಗಿ ಜನಪ್ರಿಯವಾಗಿವೆ.ಇಲ್ಲಿನ ಪ್ರಾಚೀನ ವಾಸ್ತುಶಿಲ್ಪ ಮತ್ತು ಕರಕುಶಲತೆಯು ನಿಮ್ಮನ್ನು ಮಂತ್ರಮುಗ್ಧರನ್ನಾಗಿಸುತ್ತದೆ.
ಕಪಿಲೇಶ್ವರ ದೇವಸ್ಥಾನ
ಕಪಿಲೇಶ್ವರ ದೇವಸ್ಥಾನಚಿತ್ರ ಕೃಪೆ : ವಿನಯ್ ಶಂಕರ್ ಪಾಟೀಲ್
ಬೆಳಗಾವಿಯ ಅತ್ಯಂತ ಹಳೆಯ ದೇವಾಲಯಗಳಲ್ಲಿ ಒಂದಾದ ಕಪಿಲೇಶ್ವರ ದೇವಾಲಯವನ್ನು ದಕ್ಷಿಣ ಕಾಶಿ ಎಂದೂ ಕರೆಯುತ್ತಾರೆ. ಇಲ್ಲಿರುವ ಜ್ಯೋತಿರ್ಲಿಂಗವು ಸ್ವಯಂಭೂ ಆಗಿದೆ ಮತ್ತು ಅದೇ ಆವರಣದಲ್ಲಿ ಗಣೇಶ, ಹನುಮಾನ್ ಮತ್ತು ಸಾಯಿಬಾಬಾ ದೇವಾಲಯಗಳಿವೆ. ಸ್ಥಳೀಯ ನಂಬಿಕೆಯ ಪ್ರಕಾರ, ಬೆಳಗಾವಿಯ ಕಪಿಲೇಶ್ವರ ದೇವಸ್ಥಾನವು ತುಂಬಾ ಶಕ್ತಿಯುತವಾದ ಸ್ಥಳವಾಗಿದೆ. ಶ್ರಾವಣ ಮಾಸದಲ್ಲಿ ಅಥವಾ ಮಹಾಶಿವರಾತ್ರಿ ಹಬ್ಬದಲ್ಲಿ ಈ ದೇವಸ್ಥಾನಕ್ಕೆ ಭೇಟಿ ನೀಡಿ. ಈ ಸಮಯದಲ್ಲಿ ಈ ದೇವಸ್ಥಾನವು ಬಹು ಸುಂದರವಾಗಿ ಅಲಂಕೃತಗೊಂಡಿರುತ್ತದೆ.
ಕಮಲ ಬಸದಿ
ಕಮಲಾ ಬಸದಿಚಿತ್ರಕೃಪೆ : ಸಂತೋಷ್ ಶಂಕರ್ ಪಾಟೀಲ್
ಕ್ರಿ.ಶ. 1204 ರಲ್ಲಿ ಚಾಲುಕ್ಯರ ಶೈಲಿಯಲ್ಲಿ ನಿರ್ಮಿಸಲಾದ ಕಮಲ ಬಸದಿಯು ಬೆಳಗಾವಿ ಕೋಟೆಯೊಳಗೆ ನೆಲೆಗೊಂಡಿರುವ ಜೈನರ ಪ್ರಮುಖ ಸ್ಮಾರಕವಾಗಿದೆ. ಕಪ್ಪು ಶಿಲೆಯ ನೇಮಿಂತನ ವಿಗ್ರಹವು ಕಮಲ ಬಸದಿಯ ವಿಶೇಷ ಅಕರ್ಷಣೆ ಆಗಿದೆ.
ಶ್ರೀ ಸೋಗಲ್ ಕ್ಷೇತ್ರ
ಸೋಗಲ್ ಕ್ಷೇತ್ರವು ಬೆಳಗಾವಿಯ ಒಂದು ದೇವಾಲಯ ಪಟ್ಟಣ ಮತ್ತು ಐತಿಹಾಸಿಕ ಸ್ಥಳವಾಗಿದೆ. ಮುನಿ ಸೋಗಲ್ ನಿಂದ ಈ ಪ್ರದೇಶಕ್ಕೆ ಈ ಹೆಸರು ಬಂದಿತು. ಇಲ್ಲಿ ನೀವು ದೇವಾಲಯಗಳ ಸಮೂಹವನ್ನು ಕಾಣಬಹುದಾಗಿದೆ. ಸೋಮೇಶ್ವರ ದೇವಾಲಯ, ವೀರಭದ್ರ ದೇವಾಲಯ, ಭ್ರಮರಾಂಬ ದೇವಾಲಯ, ಶಿದ್ಧೇಶ್ವರ ಲಿಂಗ ಗುಹೆ ದೇವಾಲಯ, ಕದಂಬ ನಾರಾಯಣ ಕೋಟೆ ಅವಶೇಷಗಳು, ಅಜ್ಜಪ್ಪನ ಗುಡಿ, ಸೂರ್ಯ ಚಂದ್ರ ದೇವಾಲಯ ಮತ್ತು ಗಿರಿಜಾ ದೇವಾಲಯಗಳು ಇಲ್ಲಿ ಇರುವ ಕೆಲವು ದೇವಾಲಯಗಳಾಗಿವೆ. ಸೊಗಲ್ ಬೆಳಗಾವಿಯ ಗುಡ್ಡಗಾಡು ಪ್ರದೇಶದಲ್ಲಿದೆ.
ಸೇಂಟ್ ಮೇರಿ ಚರ್ಚ್, ಬೆಳಗಾವಿ
ಬೆಳಗಾವಿಯ ಕಂಟೋನ್ಮೆಂಟ್ ಪ್ರದೇಶದಲ್ಲಿ ನೆಲೆಗೊಂಡಿರುವ ಸೇಂಟ್ ಮೇರಿ ಚರ್ಚ್ ಅನ್ನು 1869 ರಲ್ಲಿ ಗೋಕಾಕ್ ಗುಲಾಬಿ ಕಲ್ಲುಗಳನ್ನು ಬಳಸಿ ಗೋಥಿಕ್ ಶೈಲಿಯಲ್ಲಿ ನಿರ್ಮಿಸಲಾಯಿತು.
ಇಲ್ಲಿ ನೀವು ಸೌದತ್ತಿ ಯಲ್ಲಮ್ಮ, ರಾಮತೀರ್ಥ, ದೇಗಾಂವ, ಶಬರಿ ಕೊಳ್ಳ, ನಿಡಸೋಸಿ, ಗುರುದ್ವಾರ ಸಿಂಗ್ ಸಭಾ, ಯಮಕನಮರಡಿ, ಯಡೂರು, ತೆಲಸಂಗ, ತಾವಡಿ, ಶಿಪ್ಪೂರು, ಸುಳೇಭಾವಿ, ಸಿರಸಂಗಿ, ಶೇಡಬಾಳ, ಸವದಿ, ಪಂತ ಬಾಳೇಕುಂದ್ರಿ, ಸತ್ತಿ, ಸಂಕೇಶ್ವರ, ರಾಯಗೌಡ ಮುರಗಗೌಡರ, ಸಂಪಗಾಂವ, , ಕುಡಚಿಮಂಗ್ಸೂಳಿ , ಕೋಥಳಿ , ಕೊಕಟ್ನೂರು, ಹುಕ್ಕೇರಿ , ಸೇಂಟ್ ಆಂಟನಿ ಚರ್ಚ್, ಬೈಲಹೊಂಗಲ, ಕಲ್ಲೊಳ್ಳಿ, ಹೂಲಿ, ಗೋಲಿಹಳ್ಳಿ, ಚಿಂಚಳ್ಳಿ, ಅಥಣಿ ಮುಂತಾದ ಪ್ರದೇಶಗಳಿಗೆ ಭೇಟಿ ನೀಡಬಹುದು.
ತಲುಪುವುದು ಹೇಗೆ?
ಬೆಳಗಾವಿಯು ಕರ್ನಾಟಕದ ಪ್ರಮುಖ ಸ್ಥಳಗಳಿಗೆ ಮತ್ತು ದೇಶದಾದ್ಯಂತದ ಇತರ ನಗರಗಳಿಗೆ ವಿಮಾನ, ರೈಲು ಮತ್ತು ರಸ್ತೆಯ ಮೂಲಕ ಉತ್ತಮ ಸಂಪರ್ಕವನ್ನು ಹೊಂದಿದೆ.
ವಿಮಾನ ಸಾರಿಗೆ
ಬೆಳಗಾವಿಯಲ್ಲಿ ಸುಸಜ್ಜಿತ ವಿಮಾನ ನಿಲ್ದಾಣವಿದೆ. ಇದು ಬೆಂಗಳೂರು, ಹೈದರಾಬಾದ್, ದೆಹಲಿ, ಮುಂಬೈ, ಅಹಮದಾಬಾದ್, ಭುಜ್, ಇಂದೋರ್, ಜೋಧ್‌ಪುರ, ನಾಗ್ಪುರ, ನಾಸಿಕ್, ಸೂರತ್ ಮತ್ತು ತಿರುಪತಿಯಂತಹ ನಗರಗಳಿಗೆ ಉತ್ತಮ ವಿಮಾನ ಸಾರಿಗೆ ಸಂಪರ್ಕವನ್ನು ಹೊಂದಿದೆ.
ರೈಲು ಸಾರಿಗೆ
ಬೆಳಗಾವಿ ರೈಲು ನಿಲ್ದಾಣವು ವಾಯುವ್ಯ ಕರ್ನಾಟಕದ ಪ್ರಮುಖ ನಿಲ್ದಾಣಗಳಲ್ಲಿ ಒಂದಾಗಿದೆ ಮತ್ತು ಕರ್ನಾಟಕ ಮತ್ತು ಮಹಾರಾಷ್ಟ್ರದ ಪ್ರಮುಖ ನಗರಗಳೊಂದಿಗೆ ಉತ್ತಮ ಸಂಪರ್ಕ ಹೊಂದಿದೆ.
ರಸ್ತೆ ಸಾರಿಗೆ
ಕೆಎಸ್‌ಆರ್‌ಟಿಸಿ, ರಾಜ್ಯದ ಸಾರ್ವಜನಿಕ ಸಾರಿಗೆ ಸೇವೆಯು ಕರ್ನಾಟಕದ ಪ್ರಮುಖ ನಗರಗಳಿಂದ ಇಲ್ಲಿಗೆ ಲಭ್ಯವಿದೆ. ಸ್ಥಳೀಯ ದೃಶ್ಯವೀಕ್ಷಣೆಗೆ, ನೀವು ಟ್ಯಾಕ್ಸಿ ಅಥವಾ ಸ್ಥಳೀಯ ಸಾರ್ವಜನಿಕ ಸಾರಿಗೆಯನ್ನು ಬಾಡಿಗೆಗೆ ಪಡೆಯಬಹುದು.
