ದುಬೈ ವರ್ಲ್ಡ್ ಟ್ರೇಡ್ ಸೆಂಟರ್‌ನಲ್ಲಿ ೨೦೨೬ ರ ಸೆಪ್ಟೆಂಬರ್ ೧೪ ರಿಂದ ೧೭ ರವರೆಗೆ ನಡೆದ ೩೩ ನೇ ಆವೃತ್ತಿಯ ‘ಅರೇಬಿಯನ್ ಟ್ರಾವೆಲ್ ಮಾರ್ಕೆಟ್’ (ATM) ದುಬೈ ೨೦೨೬ ರ ನಾಲ್ಕು ದಿನಗಳ ಬೃಹತ್ ಪ್ರದರ್ಶನದಲ್ಲಿ ಕರ್ನಾಟಕ ರಾಜ್ಯದ ನಿಯೋಗವು ಭಾಗವಹಿಸಿತ್ತು.
ಈ ಪ್ರದರ್ಶನದಲ್ಲಿ ರಾಜ್ಯದ ನಿಯೋಗವು ಜಗತ್ತಿನಾದ್ಯಂತ ಆಗಮಿಸಿದ್ದ ೫೫,೦೦೦ ಕ್ಕೂ ಹೆಚ್ಚು ಪ್ರವಾಸೋದ್ಯಮ ಕ್ಷೇತ್ರದ ತಜ್ಞರು ಹಾಗೂ ವೃತ್ತಿಪರರಿಗೆ ಕರ್ನಾಟಕದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆ, ನೈಸರ್ಗಿಕ ವೈವಿಧ್ಯತೆ ಮತ್ತು ವಾಣಿಜ್ಯ ಪ್ರವಾಸೋದ್ಯಮದ ಅಗಾಧ ಸಾಧ್ಯತೆಗಳನ್ನು ಯಶಸ್ವಿಯಾಗಿ ಪರಿಚಯಿಸಿತು.
ಉದ್ಘಾಟನೆ ಮತ್ತು ನೇತೃತ್ವ
ದುಬೈನಲ್ಲಿರುವ ಭಾರತದ ಕಾನ್ಸುಲ್ ಜನರಲ್ ಹೆಚ್.ಇ. ಡಾ. ಇ. ವಿಷ್ಣುವರ್ಧನ್ ರೆಡ್ಡಿ ಅವರು ಕರ್ನಾಟಕ ಪ್ರವಾಸೋದ್ಯಮದ ಸ್ಟಾಲ್ ಅನ್ನು ಅಧಿಕೃತವಾಗಿ ಉದ್ಘಾಟಿಸಿದರು. ಈ ವಿಶೇಷ ಸಂದರ್ಭದ ಅಂಗವಾಗಿ ನಡೆದ ಸಮಾರಂಭದಲ್ಲಿ ಹಿರಿಯ ಸರ್ಕಾರಿ ನಾಯಕರು ಹಾಗೂ ಪ್ರವಾಸೋದ್ಯಮ ಇಲಾಖೆಯ ಅಧಿಕಾರಿಗಳು ಉಪಸ್ಥಿತರಿದ್ದರು.
ಮಾನ್ಯ ಇಂಧನ ಹಾಗೂ ಪ್ರವಾಸೋದ್ಯಮ ಸಚಿವರಾದ ಶ್ರೀ ಕೆಲಚಂದ್ರ ಜೋಸೆಫ್ ಜಾರ್ಜ್ ಅವರು ಅಧಿಕೃತ ನಿಯೋಗದ ನೇತೃತ್ವ ವಹಿಸಿದ್ದರು. ರಾಜ್ಯವನ್ನು ಪ್ರತಿನಿಧಿಸಿದ ಪ್ರಮುಖ ಮುಖಂಡರು ಹಾಗೂ ಅಧಿಕಾರಿಗಳ ವಿವರ:
- ಶ್ರೀ ಶ್ರೀನಿವಾಸ್ ಎಂ: ಅಧ್ಯಕ್ಷರು, ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ (ಕೆ ಎಸ್ ಟಿ ಡಿ ಸಿ )
- ಡಾ. ರಾಮ್ ಪ್ರಸಾತ್ ಮನೋಹರ್, ಭಾ.ಆ.ಸೇ : ಕಾರ್ಯದರ್ಶಿಗಳು, ಪ್ರವಾಸೋದ್ಯಮ ಇಲಾಖೆ
- ಶ್ರೀ ಶಿವಪ್ರಸಾದ್ ಪಿ.ಆರ್., ಭಾ.ಆ.ಸೇ : ವ್ಯವಸ್ಥಾಪಕ ನಿರ್ದೇಶಕರು, ಕೆ ಎಸ್ ಟಿ ಡಿ ಸಿ
- ಶ್ರೀ ಜನಾರ್ಧನ ಹೆಚ್. ಪಿ.: ಜಂಟಿ ನಿರ್ದೇಶಕರು, ಪ್ರವಾಸೋದ್ಯಮ ಇಲಾಖೆ
ಜಾಗತಿಕ (B2B)ಉದ್ಯಮ ಪಾಲುದಾರಿಕೆಗೆ ಉತ್ತೇಜನ
ಕರ್ನಾಟಕದ ಹೋಟೆಲ್ ಮಾಲೀಕರು, ಟ್ರಾವೆಲ್ ಏಜೆಂಟ್‌ಗಳು ಮತ್ತು ಟೂರ್ ಆಪರೇಟರ್‌ಗಳು ತಮ್ಮ ಸ್ಟಾಲ್‌ನಲ್ಲಿ ವಿದೇಶಿ ಉದ್ಯಮಿಗಳ ಜೊತೆ ನೇರವಾಗಿ ಮಾತುಕತೆ ನಡೆಸಿದರು. ನಾಲ್ಕು ದಿನಗಳ ಈ ಕಾರ್ಯಕ್ರಮದಲ್ಲಿ ನಮ್ಮ ತಂಡವು ಮುಂಚಿತವಾಗಿ ನಿಗದಿಯಾಗಿದ್ದ ಹಲವು ವ್ಯಾಪಾರ ಸಭೆಗಳನ್ನು ಯಶಸ್ವಿಯಾಗಿ ನಡೆಸಿತು.
ಈ ಮಾತುಕತೆಗಳು ಗಲ್ಫ್ ಒಕ್ಕೂಟದ (GCC) ದೇಶಗಳಲ್ಲಿರುವ ಟ್ರಾವೆಲ್ ಏಜೆನ್ಸಿಗಳು, ಕಂಪನಿ ಪ್ರತಿನಿಧಿಗಳು ಮತ್ತು ಪ್ರವಾಸ ಸಂಘಟಕರೊಂದಿಗೆ ನಮ್ಮ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸಿದವು. ಇದರ ಫಲವಾಗಿ, ಮಧ್ಯಪ್ರಾಚ್ಯ (Middle East) ದೇಶಗಳಿಂದ ಕರ್ನಾಟಕಕ್ಕೆ ಬರುವ ಪ್ರವಾಸಿಗರ ಸಂಖ್ಯೆಯನ್ನು ಹೆಚ್ಚಿಸಲು ನಮ್ಮ ತಂಡವು ಯಶಸ್ವಿ ಹಾದಿಯನ್ನು ಕಂಡುಕೊಂಡಿದೆ.
ಮುಖ್ಯ ಪ್ರವಾಸೋದ್ಯಮ ಆಕರ್ಷಣೆಗಳು ಮತ್ತು ಅನುಭವಗಳು
ಪರಂಪರೆ ಮತ್ತು ಜೀವನ ಸಂಸ್ಕೃತಿ
ಕರ್ನಾಟಕದ ತಂಡವು ಹಂಪಿ, ಪಟ್ಟದಕಲ್ಲು ಮತ್ತು ಹೊಯ್ಸಳರ ಪವಿತ್ರ ದೇವಾಲಯಗಳನ್ನೊಳಗೊಂಡ ಯುನೆಸ್ಕೋ (UNESCO) ವಿಶ್ವ ಪಾರಂಪರಿಕ ತಾಣಗಳನ್ನು ಪ್ರಮುಖವಾಗಿ ಪರಿಚಯಿಸಿತು. ಇದರೊಂದಿಗೆ, ಆಗಮಿಸಿದ ಪ್ರವಾಸಿಗರು ಮೈಸೂರಿನ ಭವ್ಯ ಅರಮನೆಗಳು, ಸಾಂಪ್ರದಾಯಿಕ ಕರಕುಶಲ ವಸ್ತುಗಳು, ನಾಡ ಹಬ್ಬಗಳು ಮತ್ತು ಇಲ್ಲಿನ ನೈಜ ಖಾದ್ಯಗಳ ವಿಶೇಷತೆಯನ್ನು ತಿಳಿದುಕೊಂಡರು.
ವನ್ಯಜೀವಿ ಮತ್ತು ಪರಿಸರ ಪ್ರವಾಸೋದ್ಯಮ
ಕರ್ನಾಟಕದ ಪ್ರದರ್ಶನದಲ್ಲಿ ಕಬಿನಿ, ಬಂಡೀಪುರ, ನಾಗರಹೊಳೆ, ದಾಂಡೇಲಿ ಮತ್ತು ಪಶ್ಚಿಮ ಘಟ್ಟಗಳಂತಹ ಪ್ರಸಿದ್ಧ ವನ್ಯಜೀವಿ ಧಾಮಗಳನ್ನು ಪ್ರಮುಖವಾಗಿ ಪ್ರದರ್ಶಿಸಲಾಯಿತು. ಜಂಗಲ್ ಸಫಾರಿ, ಪಕ್ಷಿ ವೀಕ್ಷಣೆ, ಚಾರಣ (ಟ್ರಕ್ಕಿಂಗ್) ಮತ್ತು ಸಾಹಸಮಯ ಪರಿಸರ ಪ್ರವಾಸೋದ್ಯಮದ ಅತ್ಯುತ್ತಮ ಅವಕಾಶಗಳ ಕುರಿತು ಅಂತಾರಾಷ್ಟ್ರೀಯ ಪ್ರವಾಸೋದ್ಯಮ ಪಾಲುದಾರರು ಹೆಚ್ಚಿನ ಮಾಹಿತಿ ಪಡೆದುಕೊಂಡರು.
ಆರೋಗ್ಯ, ಯೋಗ ಮತ್ತು ಆಯುರ್ವೇದ
ಕರ್ನಾಟಕದ ಸಾಂಪ್ರದಾಯಿಕ ಆಯುರ್ವೇದ ಹಾಗೂ ಆರೋಗ್ಯ ಕೇಂದ್ರಗಳನ್ನು (Wellness Ecosystems) ಮನಸ್ಸಿಗೆ ಪ್ರಶಾಂತತೆ ನೀಡುವ ದೀರ್ಘಾವಧಿಯ ವಾಸ್ತವ್ಯಕ್ಕೆ ಅತ್ಯಂತ ಸೂಕ್ತ ಸ್ಥಳಗಳಾಗಿ ಪರಿಚಯಿಸಲಾಯಿತು. ಪ್ರಕೃತಿಯ ಮಡಿಲಲ್ಲಿರುವ ಈ ಶಾಂತಿಯುತ ವಾತಾವರಣವು ಪ್ರವಾಸಿಗರಿಗೆ ನೈಜ ಚಿಕಿತ್ಸೆ ಮತ್ತು ಸಂಪೂರ್ಣ ವಿಶ್ರಾಂತಿಯ ಅನುಭವವನ್ನು ನೀಡುತ್ತದೆ.
ಕರಾವಳಿ ಮತ್ತು ಸಾಹಸ ಜಲಕ್ರೀಡೆಗಳು
ಗೋಕರ್ಣ, ಕಾರವಾರ, ಮುರುಡೇಶ್ವರ ಮತ್ತು ಮಲ್ಪೆ ಸೇರಿದಂತೆ ಅರಬ್ಬಿ ಸಮುದ್ರ ತೀರದ ಸುಂದರ ಕಡಲತೀರಗಳು ಹಾಗೂ ಧಾರ್ಮಿಕ ಕ್ಷೇತ್ರಗಳನ್ನು ಪ್ರಮುಖವಾಗಿ ಪ್ರಚಾರ ಮಾಡಲಾಯಿತು. ಈ ಕರಾವಳಿ ತಾಣಗಳು ಪ್ರವಾಸಿಗರಿಗೆ ಪ್ರಶಾಂತ ವಾತಾವರಣ, ಅತ್ಯಾಕರ್ಷಕ ಜಲಕ್ರೀಡೆಗಳು ಮತ್ತು ಸ್ಥಳೀಯ ವಿಶೇಷ ಕರಾವಳಿ ಆಹಾರಗಳ ಸಂಪೂರ್ಣ ಅನುಭವವನ್ನು ನೀಡುತ್ತವೆ.
ಸಾಂಸ್ಕೃತಿಕ ಕರಕುಶಲತೆ ಮತ್ತು ವಾಣಿಜ್ಯ ಪ್ರವಾಸೋದ್ಯಮ (MICE)
‘ಒಂದು ಜಿಲ್ಲೆ ಒಂದು ಉತ್ಪನ್ನ’ (ODOP) ಯೋಜನೆಯಡಿಯ ಪ್ರಾದೇಶಿಕ ವಿಶೇಷ ಉತ್ಪನ್ನಗಳನ್ನು ಈ ಪ್ರದರ್ಶನದಲ್ಲಿ ವಿಶೇಷವಾಗಿ ಪ್ರದರ್ಶಿಸಲಾಯಿತು. ಇದರೊಂದಿಗೆ, ಬೃಹತ್ ವಾಣಿಜ್ಯ ಸಮಾವೇಶಗಳು ಹಾಗೂ ಉದ್ಯಮ ಸಭೆಗಳನ್ನು (MICE) ನಡೆಸಲು ಕರ್ನಾಟಕಕ್ಕಿರುವ ಅಗಾಧ ಸಾಮರ್ಥ್ಯವನ್ನು ಬಿಂಬಿಸಲು ಬೆಂಗಳೂರಿನ ತಂತ್ರಜ್ಞಾನ ವಲಯದ ವಿಶೇಷತೆಗಳನ್ನು ಪರಿಚಯಿಸಲಾಯಿತು.
ಮುಂದಿನ ಹೆಜ್ಜೆ ಮತ್ತು ಭವಿಷ್ಯದ ನೋಟ
ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಯು ಅಂತಾರಾಷ್ಟ್ರೀಯ ಉದ್ಯಮ ಪಾಲುದಾರರೊಂದಿಗೆ ನಿರಂತರ ಮಾತುಕತೆ ನಡೆಸುವ ಮೂಲಕ ತನ್ನ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸುತ್ತಿದೆ. ‘ಎಟಿಎಮ್ ದುಬೈ ೨೦೨೬’ (ATM Dubai 2026) ಪ್ರದರ್ಶನದಲ್ಲಿ ಭಾಗವಹಿಸಿರುವುದು, ಕರ್ನಾಟಕವನ್ನು ಪಾರಂಪರಿಕ ವೈಭವ, ಪ್ರಾಕೃತಿಕ ಚೇತರಿಕೆ ಮತ್ತು ಆಧುನಿಕ ಪ್ರವಾಸೋದ್ಯಮ ಅನುಭವಗಳ ಅತ್ಯುತ್ತಮ ಸಮ್ಮಿಶ್ರಣವಾಗಿ ಜಾಗತಿಕ ಮಟ್ಟದಲ್ಲಿ ಯಶಸ್ವಿಯಾಗಿ ಗುರುತಿಸಿಕೊಂಡಿದೆ.
