ಲಂಡನ್: ಯುಕೆ (UK) ಯುನೈಟೆಡ್ ಕಿಂಗ್‌ಡಮ್‌ನಲ್ಲಿ ಕರ್ನಾಟಕ ಪ್ರವಾಸೋದ್ಯಮವು ಭಾರೀ ಸದ್ದು ಮಾಡುತ್ತಿದೆ. ರಾಜ್ಯ ಸರ್ಕಾರವು ಇತ್ತೀಚೆಗೆ ಮ್ಯಾಂಚೆಸ್ಟರ್‌ನಲ್ಲಿ ತನ್ನ ಪ್ರಥಮ ಪ್ರವಾಸೋದ್ಯಮ ರೋಡ್‌ಶೋ ಆಯೋಜಿಸಿದ್ದು, ‘ವರ್ಲ್ಡ್ ಟ್ರಾವೆಲ್ ಮಾರ್ಕೆಟ್’ (WTM) ಲಂಡನ್ ೨೦೨೬ ರಲ್ಲಿ ಕರ್ನಾಟಕದ ಸಮೃದ್ಧ ಪರಂಪರೆಯನ್ನು ಅತ್ಯಂತ ವೈಭವದಿಂದ ಪ್ರದರ್ಶಿಸಿದೆ.
ಈ ಜಾಗತಿಕ ಕಾರ್ಯಕ್ರಮಗಳು ಕರ್ನಾಟಕದ ವೈವಿಧ್ಯಮಯ ಸಂಸ್ಕೃತಿ, ರಮಣೀಯ ಕಾಫಿ ತೋಟದ ಪಥಗಳು ಮತ್ತು ಜಾಗತಿಕ ಮಟ್ಟದ ಐತಿಹಾಸಿಕ ಸ್ಮಾರಕಗಳನ್ನು ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಅನಾವರಣಗೊಳಿಸಿವೆ. ರಾಜ್ಯದ ಪ್ರವಾಸೋದ್ಯಮ ನಾಯಕರು ಈ ಜಾಗತಿಕ ಕುತೂಹಲವನ್ನು ಪ್ರವಾಸಿಗರ ಭೇಟಿ ಹಾಗೂ ನೈಜ ಪ್ರವಾಸೋದ್ಯಮ ಪ್ರಗತಿಯನ್ನಾಗಿ ಪರಿವರ್ತಿಸುವ ಗುರಿ ಹೊಂದಿದ್ದಾರೆ.
ಹೊಸ ದಿಗಂತದತ್ತ: ಮ್ಯಾಂಚೆಸ್ಟರ್‌ನಲ್ಲಿ ಕರ್ನಾಟಕದ ಪ್ರಥಮ ರೋಡ್‌ಶೋ
೨೦೨೬ರ ನವೆಂಬರ್ ೩ ರಂದು, ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಯು ಮ್ಯಾಂಚೆಸ್ಟರ್‌ನಲ್ಲಿ ತನ್ನ ರೋಡ್‌ಶೋ ಆಯೋಜಿಸುವ ಮೂಲಕ ಅಂತಾರಾಷ್ಟ್ರೀಯ ಮಟ್ಟದ ಸಾರ್ವಜನಿಕ ಸಂಪರ್ಕವನ್ನು ಮತ್ತಷ್ಟು ವಿಸ್ತರಿಸಿತು. ಈ ಪ್ರಮುಖ ಕಾರ್ಯಕ್ರಮದಲ್ಲಿ ಐವತ್ತಕ್ಕೂ ಹೆಚ್ಚು ಪ್ರವಾಸೋದ್ಯಮ ಏಜೆಂಟರು ಮತ್ತು ಟೂರ್ ಆಪರೇಟರ್‌ಗಳು ಭಾಗವಹಿಸಿದ್ದರು. ರಾಜ್ಯ ಪ್ರವಾಸೋದ್ಯಮ ಅಧಿಕಾರಿಗಳೊಂದಿಗೆ ನೇರ ಮಾತುಕತೆ ನಡೆಸಿದ ಅವರು, ವೃತ್ತಿಪರ ಹಾಗೂ ಉದ್ಯಮ ಸಹಭಾಗಿತ್ವಕ್ಕೆ ಬಲವಾದ ಅಡಿಪಾಯ ಹಾಕಿದರು.
ಮುಖ್ಯ ಗುರಿ: ಈ ಕಾರ್ಯಕ್ರಮದ ಪ್ರಾಥಮಿಕ ಉದ್ದೇಶ ಸರಳವಾಗಿದೆ – ರಾಜ್ಯದ ಪ್ರವಾಸಿ ತಾಣಗಳ ಕೇವಲ ಪರಿಚಯಕ್ಕಷ್ಟೇ ಸೀಮಿತವಾಗದೆ, ಯುಕೆ (UK) ಪ್ರವಾಸೋದ್ಯಮ ಸಂಸ್ಥೆಗಳು ತಮ್ಮ ಪ್ರವಾಸ ಪ್ಯಾಕೇಜ್‌ಗಳಲ್ಲಿ ಕರ್ನಾಟಕವನ್ನು ಸಕ್ರಿಯವಾಗಿ ಸೇರ್ಪಡೆಗೊಳಿಸುವಂತೆ ಮಾಡುವುದು.
- ಕರಾವಳಿ ಮತ್ತು ಮಲೆನಾಡಿನತ್ತ ಗಮನ: ಈ ರೋಡ್‌ಶೋನಲ್ಲಿ ಕರ್ನಾಟಕದ ರಮಣೀಯ ಕರಾವಳಿ ತೀರಗಳು, ಪಶ್ಚಿಮ ಘಟ್ಟಗಳ ಸಾಲುಗಳು ಮತ್ತು ಕಣ್ಣುಸೆಳೆಯುವ ಪ್ರದೇಶಗಳನ್ನು ವಿಶೇಷವಾಗಿ ಬಿಂಬಿಸಲಾಯಿತು.
- ಕಾಫಿನಾಡಿನ ಸೌಂದರ್ಯ: ಪ್ರವಾಸಿಗರನ್ನು ಆಕರ್ಷಿಸುವ ತೋಟದ ಭೂಪ್ರದೇಶ ವಾಸ್ತವ್ಯ ಹಾಗೂ ಹಸಿರಿನ ಮಡಿಲಲ್ಲಿ ಪ್ರಶಾಂತ ಪ್ರವಾಸದ ಅನುಭವಗಳೊಂದಿಗೆ ಚಿಕ್ಕಮಗಳೂರು ಮತ್ತು ಕೊಡಗು ಮುಂಚೂಣಿಯಲ್ಲಿ ಮಿಂಚಿದವು.
- ವೈವಿಧ್ಯಮಯ ಪ್ರವಾಸೋದ್ಯಮ: ಇವುಗಳೊಂದಿಗೆ ರಾಜ್ಯದ ವೈಭವೋಪೇತ ಪರಂಪರೆ, ವನ್ಯಜೀವಿ ಸಂಪತ್ತು, ಆಯುರ್ವೇದ-ಯೋಗ ಹಾಗೂ ಐಷಾರಾಮಿ ಪ್ರವಾಸೋದ್ಯಮದ ಕೊಡುಗೆಗಳನ್ನು ಸಹ ಪ್ರಸ್ತುತಪಡಿಸಲಾಯಿತು.
ಪ್ರವಾಸೋದ್ಯಮ ಇಲಾಖೆಯ ಕಾರ್ಯದರ್ಶಿ ಡಾ. ರಾಮ್ ಪ್ರಸಾತ್ ಮನೋಹರ್, ಕೆಎಸ್‌ಟಿಡಿಸಿ (KSTDC) ವ್ಯವಸ್ಥಾಪಕ ನಿರ್ದೇಶಕ ಶಿವಪ್ರಸಾದ್ ಪಿ.ಆರ್., ಜಂಗಲ್ ಲಾಡ್ಜಸ್ ಅಂಡ್ ರೆಸಾರ್ಟ್ಸ್ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಶಿವಾರಾಮ್ ಬಾಬು ಎಂ. (IFS) ಹಾಗೂ ಪ್ರವಾಸೋದ್ಯಮ ಇಲಾಖೆಯ ಜಂಟಿ ನಿರ್ದೇಶಕರು ಜನಾರ್ಧನ ಹೆಚ್.ಪಿ. ಅವರು ಯುಕೆ ಟ್ರಾವೆಲ್ ಉದ್ಯಮಿಗಳೊಂದಿಗೆ ಸಂವಾದ ನಡೆಸಿ, ಕರ್ನಾಟಕ ಪ್ರವಾಸೋದ್ಯಮದ ಅಪಾರ ಅವಕಾಶಗಳನ್ನು ಪರಿಚಯಿಸಿದರು.
“ನಮ್ಮ ಉದ್ದೇಶ ಕೇವಲ ಪ್ರವಾಸಿ ತಾಣಗಳ ಪರಿಚಯಕ್ಕಷ್ಟೇ ಸೀಮಿತವಾಗಿಲ್ಲ; ಬದಲಿಗೆ ಯುಕೆ ಪ್ರವಾಸೋದ್ಯಮ ಉದ್ಯಮಿಗಳಲ್ಲಿ ಮೂಡಿರುವ ಆಸಕ್ತಿಯನ್ನು ನೈಜ ಪ್ರವಾಸ ಯೋಜನೆಗಳನ್ನು ಹಾಗೂ ಪ್ರವಾಸಿಗರ ಭೇಟಿಯನ್ನಾಗಿ ಪರಿವರ್ತಿಸುವುದಾಗಿದೆ. ಪ್ರಕೃತಿ, ಸಂಸ್ಕೃತಿ ಮತ್ತು ನಿಕಟ ಪ್ರವಾಸದ ಅನುಭವಗಳನ್ನು ಬಯಸುವ ಯುಕೆ ಪ್ರವಾಸಿಗರಲ್ಲಿ ಕರ್ನಾಟಕದ ಕರಾವಳಿ, ಮಲೆನಾಡು ಹಾಗೂ ಕಾಫಿನಾಡಿನ ಅನುಭವಗಳು ಭಾರಿ ಜನಪ್ರಿಯತೆ ಗಳಿಸುವ ಉತ್ತಮ ಸಾಮರ್ಥ್ಯವನ್ನು ಹೊಂದಿವೆ,” ಎಂದು ಡಾ. ರಾಮ್ ಪ್ರಸಾತ್ ಮನೋಹರ್ ತಿಳಿಸಿದರು.
ನಮ್ಮ ಮುಖ್ಯಮಂತ್ರಿ ಡಿ. ಕೆ. ಶಿವಕುಮಾರ್ ಹಾಗೂ ಇಂಧನ ಮತ್ತು ಪ್ರವಾಸೋದ್ಯಮ ಸಚಿವರು ಕೆ. ಜೆ. ಜಾರ್ಜ್ ಅವರ ನಾಯಕತ್ವವು ಈ ಅಂತಾರಾಷ್ಟ್ರೀಯ ಪ್ರಚಾರ ಅಭಿಯಾನಗಳಿಗೆ ನಿರಂತರ ಬೆಂಬಲ ಹಾಗೂ ಚಾಲನೆ ನೀಡುತ್ತಿದೆ ಎಂದು ಅವರು ಉಲ್ಲೇಖಿಸಿದರು. ಭಾರತೀಯ ಕಾನ್ಸುಲ್ ಜನರಲ್, ವಿಶಾಖಾ ಯದುವಂಶಿ ಅವರೂ ಸಹ ಈ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಸಂಪೂರ್ಣ ಸಹಕಾರ ವ್ಯಕ್ತಪಡಿಸಿದರು.
ವರ್ಲ್ಡ್ ಟ್ರಾವೆಲ್ ಮಾರ್ಕೆಟ್ ಲಂಡನ್ ೨೦೨೬: ಜಾಗತಿಕ ವೇದಿಕೆಯಲ್ಲಿ ಕರ್ನಾಟಕದ ವೈಭವದ ಮಿಂಚು
ಮ್ಯಾಂಚೆಸ್ಟರ್ ಕಾರ್ಯಕ್ರಮದ ಯಶಸ್ಸಿನ ನಂತರ, ಈ ಪ್ರಚಾರ ಅಭಿಯಾನವು ‘ವರ್ಲ್ಡ್ ಟ್ರಾವೆಲ್ ಮಾರ್ಕೆಟ್’ (WTM) ಲಂಡನ್ ೨೦೨೬ ರಂಗಕ್ಕೆ ಕಾಲಿಟ್ಟಿತು.
ಕೇಂದ್ರ ಪ್ರವಾಸೋದ್ಯಮ ಮತ್ತು ಸಂಸ್ಕೃತಿ ಸಚಿವರು ಶ್ರೀ ಗಜೇಂದ್ರ ಸಿಂಗ್ ಶೇಖಾವತ್ ಹಾಗೂ ರಾಜ್ಯಸಭಾ ಸಂಸದೆ ಶ್ರೀಮತಿ ಸುಧಾ ಮೂರ್ತಿ ಅವರು ಕರ್ನಾಟಕ ಪ್ರವಾಸೋದ್ಯಮದ ಪೆವಿಲಿಯನ್ ಅನ್ನು ಅಧಿಕೃತವಾಗಿ ಉದ್ಘಾಟಿಸಿದರು. ಈ ಉನ್ನತ ಮಟ್ಟದ ಉದ್ಘಾಟನಾ ಸಮಾರಂಭದಲ್ಲಿ ಡಾ. ರಾಮ್ ಪ್ರಸಾತ್ ಮನೋಹರ್, ಶಿವಪ್ರಸಾದ್ ಪಿ.ಆರ್., ಶಿವಾರಾಮ್ ಬಾಬು ಎಂ., ಮತ್ತು ಜನಾರ್ದನ ಹೆಚ್.ಪಿ. ಅವರನ್ನೊಳಗೊಂಡ ಕರ್ನಾಟಕದ ಉನ್ನತ ನಿಯೋಗವು ಭಾಗವಹಿಸಿತ್ತು.
ಈ ಜಾಗತಿಕ ಉದ್ಯಮ ವೇದಿಕೆಯು ಕರ್ನಾಟಕದ ಭವ್ಯ ಐತಿಹಾಸಿಕ ಸ್ಮಾರಕಗಳು, ಆಧ್ಯಾತ್ಮಿಕ ಕ್ಷೇತ್ರಗಳು, ವನ್ಯಜೀವಿ ಅಭಯಾರಣ್ಯಗಳು ಮತ್ತು ಪರಿಸರ ಪ್ರವಾಸೋದ್ಯಮ (Eco-tourism) ಯೋಜನೆಗಳನ್ನು ಜಗತ್ತಿನ ಮುಂಚೂಣಿಯಲ್ಲಿ ಪ್ರದರ್ಶಿಸಲು ಅತ್ಯಂತ ಪ್ರಭಾವಶಾಲಿ ವೇದಿಕೆಯನ್ನು ಒದಗಿಸಿತು.
ರಾಷ್ಟ್ರೀಯ ನಾಯಕರು ಹಾಗೂ ಗಣ್ಯ ವ್ಯಕ್ತಿಗಳ ಬೆಂಬಲದೊಂದಿಗೆ, ಕರ್ನಾಟಕವು ಅಂತಾರಾಷ್ಟ್ರೀಯ ಸಹಭಾಗಿತ್ವವನ್ನು ಮತ್ತಷ್ಟು ಬಲಪಡಿಸುತ್ತಿದ್ದು, ಜಾಗತಿಕ ಪ್ರವಾಸಿಗರನ್ನು ತನ್ನತ್ತ ಆಕರ್ಷಿಸುವುದನ್ನು ಮುಂದುವರಿಸಿದೆ.
ಮ್ಯಾಂಚೆಸ್ಟರ್ ರೋಡ್‌ಶೋನಿಂದ ಜಾಗತಿಕ ಖ್ಯಾತಿಯತ್ತ: ಕರ್ನಾಟಕದ ಅನನ್ಯ ಪಯಣ
ಮ್ಯಾಂಚೆಸ್ಟರ್ ರೋಡ್‌ಶೋ ಮತ್ತು WTM ಲಂಡನ್ ೨೦೨೬ ಪ್ರದರ್ಶನಗಳು ಕರ್ನಾಟಕದ ಸಮಗ್ರ ಜಾಗತಿಕ ಪ್ರಚಾರ ಅಭಿಯಾನದ ಪ್ರಮುಖ ಮೈಲಿಗಲ್ಲುಗಳಾಗಿವೆ. ಮ್ಯಾಂಚೆಸ್ಟರ್‌ನಂತಹ ಹೊಸ ಮಾರುಕಟ್ಟೆಗಳನ್ನು ತಲುಪುವ ಮೂಲಕ ಹಾಗೂ WTM ಲಂಡನ್‌ನಂತಹ ವಿಶ್ವದರ್ಜೆಯ ಪ್ರವಾಸೋದ್ಯಮ ಮೇಳಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವ ಮೂಲಕ, ಕರ್ನಾಟಕವು ಭಾರತದ ಮುಂಚೂಣಿ ಅಂತಾರಾಷ್ಟ್ರೀಯ ಪ್ರವಾಸಿ ತಾಣವಾಗಿ ತನ್ನನ್ನು ಜಾಗತಿಕ ಮಟ್ಟದಲ್ಲಿ ಬಲವಾಗಿ ಗುರುತಿಸಿಕೊಂಡಿದೆ.
ಈ ಅಭಿಯಾನವು ಯುಕೆ (UK) ಪ್ರವಾಸೋದ್ಯಮ ಉದ್ಯಮಿಗಳನ್ನು ರಾಜ್ಯದ ನೈಜ ಹಾಗೂ ವೈವಿಧ್ಯಮಯ ಪ್ರವಾಸಿ ಅನುಭವಗಳೊಂದಿಗೆ ನೇರವಾಗಿ ಬೆಸೆಯುತ್ತದೆ. ಚಿಕ್ಕಮಗಳೂರಿನ ಮಂಜುಮುಸುಕಿದ ರಮಣೀಯ ಕಾಫಿ ಗಿರಿಧಾಮಗಳಿಂದ ಹಿಡಿದು ಹಂಪಿಯ ಐತಿಹಾಸಿಕ ಶೇಷ್ಠ ವಾಸ್ತುಶಿಲ್ಪದ ಮಹಾವೈಭವದವರೆಗೆ, ಕರ್ನಾಟಕವು ಪ್ರತಿಯೊಬ್ಬ ಜಾಗತಿಕ ಪ್ರವಾಸಿಗನಿಗೂ ಸಾಟಿಯಿಲ್ಲದ ಅದ್ಭುತ ಅನುಭೂತಿಯ ಆಶ್ವಾಸನೆ ನೀಡುತ್ತದೆ.