ಪ್ರತಿ ವರ್ಷ, ಕರ್ನಾಟಕದ ಸಾಂಸ್ಕೃತಿಕ ರಾಜಧಾನಿಯು ಸಾಂಪ್ರದಾಯಿಕ ವೈಭವ ಮತ್ತು ಭಕ್ತಿಭಾವದ ಜಗಮಗಿಸುವ ಲೋಕವಾಗಿ ಮಾರ್ಪಡುತ್ತದೆ. ಅಧಿಕೃತವಾಗಿ ‘ನಾಡಹಬ್ಬ’ ಎಂದೇ ಖ್ಯಾತವಾಗಿರುವ ಮೈಸೂರು ದಸರಾ, ೧೦ ದಿನಗಳ ಕಾಲ ವಿಜೃಂಭಣೆಯಿಂದ ನಡೆಯುವ ಮಹೋತ್ಸವ. ಇದು ಪವಿತ್ರ ಧಾರ್ಮಿಕ ವಿಧಿವಿಧಾನಗಳು, ರಾಜಪರಂಪರೆಯ ಭವ್ಯತೆ ಮತ್ತು ಜನಮನ ಸೆಳೆಯುವ ಸಾಂಸ್ಕೃತಿಕ ಸಂಭ್ರಮದ ಸುಂದರ ಸಮ್ಮಿಶ್ರಣ.
ನೀವೇನಾದರೂ ಕರ್ನಾಟಕಕ್ಕೆ ಪ್ರವಾಸ ಕೈಗೊಳ್ಳಲು ಯೋಜಿಸುತ್ತಿದ್ದರೆ, ನಿಮಗಾಗಿ ಇಲ್ಲಿದೆ ಸಂಪೂರ್ಣ ಮಾರ್ಗದರ್ಶಿ. ಮೈಸೂರು ದಸರಾ ೨೦೨೬ರ ದಿನಾಂಕಗಳು, ಇತಿಹಾಸ, ಪ್ರಮುಖ ಆಕರ್ಷಣೆಗಳು, ತಂಗುವ ವ್ಯವಸ್ಥೆ, ಕೆಎಸ್‌ಟಿಡಿಸಿ (KSTDC) ಪ್ರವಾಸ ಪ್ಯಾಕೇಜ್‌ಗಳು ಹಾಗೂ ಪ್ರಯಾಣದ ಅಗತ್ಯ ವಿವರಗಳನ್ನು ಇಲ್ಲಿ ತಿಳಿದುಕೊಳ್ಳಿ.
ಮೈಸೂರು ದಸರಾ ೨೦೨೬: ಪ್ರಮುಖ ದಿನಾಂಕಗಳು ಮತ್ತು ವೇಳಾಪಟ್ಟಿ
ಈ ಭವ್ಯ ಮಹೋತ್ಸವವನ್ನು ಕಣ್ಣುಂಬಿಕೊಳ್ಳಲು ನಿಮ್ಮ ದಿನಾಂಕಗಳನ್ನು ಕಾಯ್ದಿರಿಸಿ. ಮೈಸೂರು ದಸರಾ ೨೦೨೬ರ ವಿಜೃಂಭಣೆಯ ಸಂಭ್ರಮವು ಭಾನುವಾರ, ಅಕ್ಟೋಬರ್ ೧೧, ೨೦೨೬ ರಂದು ಪ್ರಾರಂಭವಾಗಿ, ಬುಧವಾರ, ಅಕ್ಟೋಬರ್ ೨೧, ೨೦೨೬ ರಂದು ವಿಜಯದಶಮಿಯೊಂದಿಗೆ ಸಂಪನ್ನಗೊಳ್ಳಲಿದೆ.
| ಪ್ರಮುಖ ಕಾರ್ಯಕ್ರಮ | ನಿಗದಿತ ದಿನಾಂಕ | ಸ್ಥಳ |
| ಉತ್ಸವದ ಉದ್ಘಾಟನೆ ಮತ್ತು ದಸರಾ ಪೂಜೆ | ಅಕ್ಟೋಬರ್ ೧೧, ೨೦೨೬ | ಶ್ರೀ ಚಾಮುಂಡೇಶ್ವರಿ ದೇವಾಲಯ, ಚಾಮುಂಡಿ ಬೆಟ್ಟ |
| ಯುವ ದಸರಾ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳು | ಅಕ್ಟೋಬರ್ ೧೨ – ಅಕ್ಟೋಬರ್ ೨೦, ೨೦೨೬ | ಮಹಾರಾಜ ಕಾಲೇಜು ಮೈದಾನ ಮತ್ತು ಅರಮನೆಯ ಆವರಣ |
| ಮಹಾನವಮಿ ಮತ್ತು ಆಯುಧ ಪೂಜೆ | ಅಕ್ಟೋಬರ್ ೨೦, ೨೦೨೬ | ಮೈಸೂರು ಅರಮನೆ (ಅಂಬಾವಿಲಾಸ) |
| ವಿಜಯದಶಮಿ ಮತ್ತು ಜಂಬೂಸವಾರಿ ಮೆರವಣಿಗೆ | ಅಕ್ಟೋಬರ್ ೨೧, ೨೦೨೬ | ಮೈಸೂರು ಅರಮನೆಯಿಂದ ಬನ್ನಿಮಂಟಪ ಮೈದಾನದವರೆಗೆ |
| ಪಂಜಿನ ಕವಾಯತು (ಟಾರ್ಚ್‌ಲೈಟ್ ಪೆರೇಡ್) | ಅಕ್ಟೋಬರ್ ೨೧, ೨೦೨೬ (ಸಂಜೆ) | ಬನ್ನಿಮಂಟಪ ಪೆರೇಡ್ ಮೈದಾನ |
ಮೈಸೂರು ದಸರಾ ಮಹೋತ್ಸವವನ್ನು ಪ್ರಾರಂಭಿಸಿದವರು ಯಾರು? ಇತಿಹಾಸ ಮತ್ತು ಆಸಕ್ತಿಕರ ಸಂಗತಿಗಳು
ದಸರಾ ಮಹೋತ್ಸವದ ಐತಿಹಾಸಿಕ ಬೇರುಗಳು ದಕ್ಷಿಣ ಭಾರತದ ರಾಜಪರಂಪರೆಯಲ್ಲಿ ಅತ್ಯಂತ ಆಳವಾಗಿ ಹಬ್ಬಿವೆ. ಈ ಉತ್ಸವವು ಮಹಿಷಾಸುರನೆಂಬ ರಾಕ್ಷಸನನ್ನು ಸಂಹಾರ ಮಾಡಿದ ಶ್ರೀ ಚಾಮುಂಡೇಶ್ವರಿ ದೇವಿಯ ವಿಜಯದ ಸಂಕೇತವಾಗಿ ಆಚರಿಸಲ್ಪಡುತ್ತದೆ. ಸ್ವತಃ ‘ಮೈಸೂರು’ ಎಂಬ ನಗರದ ಹೆಸರು ಕೂಡ ಈ ಪೌರಾಣಿಕ ವಿಜಯದ ಇತಿಹಾಸದಿಂದಲೇ ಬಂದಿದೆ.
ವಿಜಯನಗರ ಸಾಮ್ರಾಜ್ಯದ ಮೂಲ ಮತ್ತು ಒಡೆಯರ್ ರಾಜವಂಶದ ಪರಂಪರೆ
ಹಾಗಾದರೆ, ಮೈಸೂರಿನಲ್ಲಿ ದಸರಾ ಉತ್ಸವವನ್ನು ಪ್ರಾರಂಭಿಸಿದವರು ಯಾರು? ಮೂಲತಃ ೧೪ನೇ ಶತಮಾನದಲ್ಲಿ ವಿಜಯನಗರ ಸಾಮ್ರಾಜ್ಯದ ಅರಸರು ಈ ಭವ್ಯ ಆಚರಣೆಯನ್ನು ಆರಂಭಿಸಿದರು.
ವಿಜಯನಗರ ಸಾಮ್ರಾಜ್ಯದ ನಂತರ, ರಾಜ ಒಡೆಯರ್-೧ ಅವರು ೧೬೧೦ರಲ್ಲಿ ಶ್ರೀರಂಗಪಟ್ಟಣದಲ್ಲಿ ಈ ಭವ್ಯ ಪರಂಪರೆಯನ್ನು ಪುನರುಜ್ಜೀವನಗೊಳಿಸಿದರು. ತದನಂತರ ಒಡೆಯರ್ ರಾಜವಂಶವು ಈ ಮಹೋತ್ಸವದ ಪ್ರಮುಖ ಕೇಂದ್ರವನ್ನು ಮೈಸೂರು ಅರಮನೆಗೆ ಸ್ಥಳಾಂತರಿಸಿತು.
ಮೈಸೂರು ದಸರಾದ ಕುರಿತ ಆಸಕ್ತಿಕರ ಸಂಗತಿಗಳು
- ಶತಮಾನಗಳ ಭವ್ಯ ಪರಂಪರೆ: ಈ ಉತ್ಸವವು ೪೦೦ಕ್ಕೂ ಹೆಚ್ಚು ವರ್ಷಗಳ ರಾಜಪರಂಪರೆಯ ಐತಿಹಾಸಿಕ ಹಿನ್ನೆಲೆಯನ್ನು ಹೊಂದಿದೆ.
- ೭೫೦ ಕೆ.ಜಿ ತೂಕದ ಚಿನ್ನದ ಅಂಬಾರಿ: ತರಬೇತಿ ಪಡೆದ ಪಟ್ಟದ ಆನೆಯು ೭೫೦ ಕಿಲೋಗ್ರಾಂ ತೂಕದ ಚಿನ್ನದ ಅಂಬಾರಿಯಲ್ಲಿ ಶ್ರೀ ಚಾಮುಂಡೇಶ್ವರಿ ದೇವಿಯ ಉತ್ಸವ ಮೂರ್ತಿಯನ್ನು ಹೊರುತ್ತದೆ. ಇದು ಮರದಿಂದ ಮಾಡಿದ ಚೌಕಟ್ಟಿನ ಮೇಲೆ ಸುಮಾರು ೮೦ ಕೆ.ಜಿ ತೂಕದ ಅಪರಂಜಿ ಚಿನ್ನದ ರೇಕ್ (ಪತ್ರ) ಹೊದಿಸಿ ತಯಾರಿಸಲಾದ ಹಾಗೂ ಅತ್ಯಂತ ಸುಂದರ ಸೂಕ್ಷ್ಮ ಕೆತ್ತನೆಗಳನ್ನು ಒಳಗೊಂಡಿರುವ ಭವ್ಯ ಅಂಬಾರಿ. ಹಿಂದೆ ರಾಜರು ಗಜಪಡೆಗಳ ಮೇಲೆ ಕುಳಿತು ಸಾಗಲು ಇದನ್ನು ಬಳಸಲಾಗುತ್ತಿತ್ತು.
- ದೀಪಗಳ ಜಗಮಗ: ಉತ್ಸವದ ದಿನಗಳಲ್ಲಿ ಪ್ರತಿ ಸಂಜೆ ೯೭,೦೦೦ ವಿದ್ಯುತ್ ದೀಪಗಳಿಂದ ಮೈಸೂರು ಅರಮನೆಯು ಜಗಮಗಿಸುತ್ತದೆ.
- ದರ್ಬಾರ್: ಸಾಂಪ್ರದಾಯಿಕ ರಾಜ ಉಡುಪಿನಲ್ಲಿ ರಾಜಮನೆತನದ ಪ್ರಮುಖರು ಅರಮನೆಯಲ್ಲಿ ಸಭೆ ನಡೆಸುತ್ತಾರೆ.
ಮೈಸೂರು ದಸರಾ ಇತಿಹಾಸವು ರಾಜಮನೆತನದ ದರ್ಬಾರ್ ಪರಂಪರೆಯಿಂದ ಹಿಡಿದು, ನಾಡಿನ ಜನತೆಯ ಬೃಹತ್ ಸಾಂಸ್ಕೃತಿಕ ಮಹೋತ್ಸವವಾಗಿ ಸಾಗಿಬಂದ ಸುಂದರ ಪಯಣಕ್ಕೆ ನಿದರ್ಶನವಾಗಿದೆ.
ಮುಖ ಆಕರ್ಷಣೆಗಳು: ವೈಭವೋಪೇತ ಜಂಬೂಸವಾರಿಯ ವಿಶೇಷತೆ
ದಸರಾ ಮಹೋತ್ಸವದ ಅವಧಿಯಲ್ಲಿ ಮೈಸೂರು ನಗರವು ಹಗಲು-ರಾತ್ರಿ ಎನ್ನದೆ ಅತ್ಯಂತ ಉತ್ಸಾಹ ಮತ್ತು ಸಂಭ್ರಮದಿಂದ ಕಂಗೊಳಿಸುತ್ತದೆ. ಆದರೆ, ವಿಜಯದಶಮಿಯಂದು ನಡೆಯುವ ಭವ್ಯ ಜಂಬೂಸವಾರಿ ಮೆರವಣಿಗೆಗೆ ಸಾಟಿಯಾದದ್ದು ಇನ್ನೊಂದಿಲ್ಲ.
ಭವ್ಯ ಜಂಬೂಸವಾರಿ ಮತ್ತು ಚಿನ್ನದ ಅಂಬಾರಿ
ಅಕ್ಟೋಬರ್ ೨೧ರಂದು ನಡೆಯುವ ವಿಜಯದಶಮಿ ಮೆರವಣಿಗೆಯೇ ಮೈಸೂರು ದಸರಾ ೨೦೨೬ರ ಪ್ರಮುಖ ಆಕರ್ಷಣೆಯಾಗಿದೆ. ಸ್ಥಳೀಯವಾಗಿ ‘ಜಂಬೂಸವಾರಿ’ ಎಂದೇ ಪ್ರಸಿದ್ಧವಾಗಿರುವ ಈ ಕಿಲೋಮೀಟರ್‌ಗಳಷ್ಟು ಉದ್ದದ ರಾಜಬೀದಿ ಮೆರವಣಿಗೆಯು ಮೈಸೂರು ಅರಮನೆಯ ಅಂಗಳದಿಂದ ಪ್ರಾರಂಭವಾಗುತ್ತದೆ.
ಈ ಮೆರವಣಿಗೆಯ ಪ್ರಮುಖ ಕೇಂದ್ರಬಿಂದುವೇ ‘ಮೈಸೂರು ದಸರಾ ಅಂಬಾರಿ’. ಅತ್ಯಂತ ವೈಭವದಿಂದ ಶೃಂಗರಿಸಲ್ಪಟ್ಟ ಪಟ್ಟದ ಆನೆಯು ೭೫೦ ಕಿಲೋಗ್ರಾಂ ತೂಕದ ಭವ್ಯ ಚಿನ್ನದ ಅಂಬಾರಿಯಲ್ಲಿ ಶ್ರೀ ಚಾಮುಂಡೇಶ್ವರಿ ದೇವಿಯ ಉತ್ಸವ ಮೂರ್ತಿಯನ್ನು ಹೊತ್ತು ಸಾಗುತ್ತದೆ. ಮೆರವಣಿಗೆ ಆರಂಭವಾಗುವ ಮುನ್ನ, ರಾಜಮನೆತನದ ಪ್ರಮುಖರು ಹಾಗೂ ರಾಜ್ಯದ ಗಣ್ಯರು ಅರಮನೆಯ ಆವರಣದಲ್ಲಿ ದೇವಿಗೆ ಪುಷ್ಪಾರ್ಚನೆ ಸಲ್ಲಿಸುತ್ತಾರೆ.
ಜನಪದ ಕಲಾತಂಡಗಳು, ಅರಮನೆಯ ಸೇನಾ ತುಕಡಿಗಳು ಮತ್ತು ಕರ್ನಾಟಕದ ವಿವಿಧ ಜಿಲ್ಲೆಗಳ ಸಾಂಸ್ಕೃತಿಕ ವೈವಿಧ್ಯತೆಯನ್ನು ಸಾರುವ ವರ್ಣರಂಜಿತ ಸ್ತಬ್ಧಚಿತ್ರಗಳ (ಟ್ಯಾಬ್ಲೋ) ಜೊತೆಗೆ ಆಕರ್ಷಕವಾಗಿ ಅಲಂಕರಿಸಲ್ಪಟ್ಟ ಹತ್ತಾರು ಆನೆಗಳು ಮೈಸೂರಿನ ಪ್ರಮುಖ ರಾಜಬೀದಿಗಳಲ್ಲಿ ಗಂಭೀರವಾಗಿಜ್ಜೆ ಹಾಕಿ ಸಾಗುತ್ತವೆ.
ಮೈಸೂರು ಅರಮನೆ ──> ಸಜ್ಜಾಜಿ ರಾವ್ ರಸ್ತೆ ──> ಹೈವೇ ಸರ್ಕಲ್ ──> ಬನ್ನಿಮಂಟಪ ಮೈದಾನ
೧. ಧಾರ್ಮಿಕ ದಸರಾ ಪೂಜಾ ಕೈಂಕರ್ಯಗಳು
ಚಾಮುಂಡಿ ಬೆಟ್ಟದ ಮೇಲಿರುವ ಶ್ರೀ ಚಾಮುಂಡೇಶ್ವರಿ ದೇವಿಗೆ ಅರ್ಚಕರು ಸಾಂಪ್ರದಾಯಿಕ ದಸರಾ ಪೂಜಾ ವಿಧಿವಿಧಾನಗಳನ್ನು ನೆರವೇರಿಸುತ್ತಾರೆ. ಇತ್ತ ಅರಮನೆಯ ಒಳಗೆ, ರಾಜಮನೆತನದ ಸದಸ್ಯರು ಆಯುಧಗಳು ಹಾಗೂ ರಾಜಮನೆತನದ ವಾಹನಗಳಿಗೆ ಆಯುಧ ಪೂಜೆಯನ್ನು ನೆರವೇರಿಸುತ್ತಾರೆ.
೨. ಮೈಸೂರು ದಸರಾ ವಸ್ತುಪ್ರದರ್ಶನ
ದೊಡ್ಡಕೆರೆ ಮೈದಾನದಲ್ಲಿ ನಡೆಯುವ ಮೈಸೂರು ದಸರಾ ವಸ್ತುಪ್ರದರ್ಶನವು ಸ್ಥಳೀಯರು ಹಾಗೂ ಪ್ರವಾಸಿಗರ ನೆಚ್ಚಿನ ದಸರಾ ಆಕರ್ಷಣೆಯಾಗಿದೆ. ಇದು ೧೦ ದಿನಗಳ ದಸರಾ ಉತ್ಸವ ಮುಗಿದ ಮೇಲೆಯೂ ಸುಮಾರು ಎರಡು ತಿಂಗಳಿಗೂ ಹೆಚ್ಚು ಕಾಲ ಮುಂದುವರಿಯುತ್ತದೆ. ಇಲ್ಲಿಗೆ ಬರುವ ಸಂದರ್ಶಕರು ದೇಶದ ನಾನಾ ಭಾಗಗಳ ಕರಕುಶಲ ಮಳಿಗೆಗಳು, ಸಾಹಸಮಯ ಜಲಕ್ರೀಡೆ/ರಾಟಿನೆಗಳು ಹಾಗೂ ಪ್ರಸಿದ್ಧ ಪ್ರಾದೇಶಿಕ ಖಾದ್ಯಗಳ ರುಚಿಯನ್ನು ಸವಿಯಬಹುದು.
೩. ಮೈಸೂರಿನ ಸುತ್ತಮುತ್ತಲಿನ ವಿಶೇಷ ಅನುಭವಗಳು
- ಅಂಬಾರಿ ಓಪನ್-ಟಾಪ್ ಬಸ್ ಪ್ರವಾಸ: ವಿದ್ಯುತ್ ದೀಪಗಳಿಂದ ಜಗಮಗಿಸುವ ಮೈಸೂರಿನ ಬೀದಿಗಳ ರಾತ್ರಿಯ ಸೌಂದರ್ಯವನ್ನು ಕಣ್ಣುಂಬಿಕೊಳ್ಳಲು ತೆರೆದ ಮೇಲ್ಛಾವಣಿಯ ‘ಅಂಬಾರಿ’ ಡಬಲ್ ಡೆಕ್ಕರ್ ಬಸ್‌ನಲ್ಲಿ ಪ್ರಯಾಣಿಸಿ.
- ನಿಷಾದ್ ಬಾಗ್‌ನಲ್ಲಿ ಫಲಪುಷ್ಪ ಪ್ರದರ್ಶನ: ಕುಪ್ಪಣ್ಣ ಪಾರ್ಕ್‌ನಲ್ಲಿ ಅತ್ಯಂತ ಆಕರ್ಷಕವಾಗಿ ವಿನ್ಯಾಸಗೊಳಿಸಲಾದ ಭವ್ಯ ಹೂವಿನ ಕಲಾಕೃತಿಗಳನ್ನು ಕಣ್ಣುಂಬಿಕೊಳ್ಳಿ.
- ಪಾರಂಪರಿಕ ನಡಿಗೆ ಮತ್ತು ಸ್ಥಳೀಯ ಆಹಾರ ಖಾದ್ಯಗಳು: ಸ್ಥಳೀಯ ಮಾರುಕಟ್ಟೆಗಳಿಗೆ ಭೇಟಿ ನೀಡಿ, ಅಸಲಿ ಮೈಸೂರು ಪಾಕ್ ರುಚಿ ಸವಿಯಿರಿ ಹಾಗೂ ಜಿಐ (GI) ಟ್ಯಾಗ್ ಹೊಂದಿರುವ ವಿಶ್ವಪ್ರಸಿದ್ಧ ಮೈಸೂರು ಸಿಲ್ಕ್ ಸೀರೆಗಳನ್ನು ಖರೀದಿಸಿ.
ಕರ್ನಾಟಕದಾದ್ಯಂತ ನಡೆಯುವ ಇತರೆ ವಿಶಿಷ್ಟ ದಸರಾ ಆಚರಣೆಗಳು
ಮೈಸೂರು ದಸರಾ ರಾಜ್ಯಾದ್ಯಂತ ಪ್ರಮುಖ ಸ್ಥಾನವನ್ನು ಪಡೆದಿದ್ದರೂ, ಕರ್ನಾಟಕದ ಇತರ ಪ್ರದೇಶಗಳು ನವರಾತ್ರಿಯನ್ನು ತಮ್ಮದೇ ಆದ ವಿಶಿಷ್ಟ ಹಾಗೂ ಸಾಂಸ್ಕೃತಿಕ ಪರಂಪರೆಯೊಂದಿಗೆ ಸಂಭ್ರಮಿಸುತ್ತವೆ:
- ಮಡಿಕೇರಿ ದಸರಾ (ಕೊಡಗು): ರಾತ್ರಿಯಿಡೀ ನಡೆಯುವ ‘ದಶಮಂಟಪ’ ಮೆರವಣಿಗೆಗೆ ಇದು ಅತ್ಯಂತ ಪ್ರಸಿದ್ಧ. ಭಾರಿ ಡೋಲು ವಾದ್ಯಗಳ ನಾದದ ನಡುವೆ, ರಾಕ್ಷಸ ಸಂಹಾರದ ಕಥೆಗಳನ್ನು ಬಿಂಬಿಸುವ ೧೦ ಭವ್ಯ ಹಾಗೂ ಯಾಂತ್ರಿಕ ಬೆಳಕಿನ ಕಲಾಕೃತಿಗಳ ಮಂಟಪಗಳು ನಗರದಾದ್ಯಂತ ಸಂಚರಿಸುತ್ತವೆ.
- ಮಂಗಳೂರು ದಸರಾ: ಕುದ್ರೋಳಿ ಗೋಕರ್ಣನಾಥೇಶ್ವರ ದೇವಾರಾಧನೆಯೇ ಇದರ ಪ್ರಮುಖ ಕೇಂದ್ರ. ನವದುರ್ಗೆಯರ ಸುಂದರ ಮೂರ್ತಿಗಳ ಪ್ರತಿಷ್ಠಾಪನೆ ಮತ್ತು ಜನಮನ ಸೆಳೆಯುವ ಅಬ್ಬರದ ‘ಪಿಲಿ ವೇಷ’ (ಹುಲಿ ವೇಷ) ನೃತ್ಯ ಪ್ರದರ್ಶನಗಳು ಇಲ್ಲಿನ ವಿಶೇಷ ಆಕರ್ಷಣೆ.
- ಶಿವಮೊಗ್ಗ ಮತ್ತು ಧಾರವಾಡ ದಸರಾ: ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮಗಳು, ಸಾಂಪ್ರದಾಯಿಕ ದೇಸಿ ಕುಸ್ತಿ ಪಂದ್ಯಾವಳಿಗಳು ಹಾಗೂ ಐತಿಹಾಸಿಕ ದೇವಾಲಯಗಳ ಆಚರಣೆಗಳಿಗೆ ಇವು ಹೆಸರುವಾಸಿ.
ಮೈಸೂರು ಮತ್ತು ಸುತ್ತಮುತ್ತ ತಂಗಲು ಸೂಕ್ತ ಸ್ಥಳಗಳು
ದಸರಾ ೨೦೨೬ರ ಪ್ರವಾಸಕ್ಕಾಗಿ ಸೂಕ್ತ ವಸತಿ ವ್ಯವಸ್ಥೆಯನ್ನು ಮುಂಚಿತವಾಗಿಯೇ ಕಾಯ್ದಿರಿಸುವುದು ಅತ್ಯಂತ ಅಗತ್ಯ. ಮೈಸೂರು ನಗರದ ಹೃದಯಭಾಗದಲ್ಲಿರುವ ಸರ್ಕಾರಿ ಹೆರಿಟೇಜ್ ಹೋಟೆಲ್‌ಗಳಿಂದ ಹಿಡಿದು, ಸಮೀಪದ ಐಷಾರಾಮಿ ರೆಸಾರ್ಟ್‌ಗಳವರೆಗೆ, ನಿಮ್ಮ ತಂಗುವಿಕೆಗೆ ಅತ್ಯಂತ ಸೂಕ್ತವಾದ ಪ್ರಮುಖ ಸ್ಥಳಗಳ ವಿವರ ಇಲ್ಲಿದೆ:
ಅಧಿಕೃತ ಕೆಎಸ್‌ಟಿಡಿಸಿ ಹೋಟೆಲ್‌ಗಳು
- ಕೆಎಸ್‌ಟಿಡಿಸಿ ಹೋಟೆಲ್ ಮಯೂರ ಹೊಯ್ಸಳ, ಮೈಸೂರು: ಮೈಸೂರು ಜಂಕ್ಷನ್ ರೈಲು ನಿಲ್ದಾಣದ ಅತ್ಯಂತ ಸಮೀಪದಲ್ಲಿದ್ದು, ಕುಟುಂಬ ಸಮೇತ ತಂಗಲು ಅತ್ಯಂತ ಆರಾಮದಾಯಕ ಹಾಗೂ ಸೂಕ್ತವಾದ ಹೋಟೆಲ್.
- ಲಲಿತ ಮಹಲ್ ಪ್ಯಾಲೇಸ್ ಹೋಟೆಲ್: ಜಂಗಲ್ ಲಾಡ್ಜಸ್ ಅಂಡ್ ರೆಸಾರ್ಟ್ಸ್ (JLR) ನಿರ್ವಹಣೆಯಲ್ಲಿರುವ ಭಾರತದ ಎರಡನೇ ಅತಿದೊಡ್ಡ ಅರಮನೆಯಲ್ಲಿ ರಾಜವೈಭವದ ಅದ್ಭುತ ಅನುಭವವನ್ನು ಪಡೆದುಕೊಳ್ಳಿ.
- ಎಲ್ಲಾ ಕೆಎಸ್‌ಟಿಡಿಸಿ ಹೋಟೆಲ್‌ಗಳನ್ನು ವೀಕ್ಷಿಸಿ: ಕರ್ನಾಟಕದಾದ್ಯಂತ ಇರುವ ಸರ್ಕಾರಿ ಹೆರಿಟೇಜ್ ಹಾಗೂ ಬಜೆಟ್ ಸ್ನೇಹಿ ಹೋಟೆಲ್‌ಗಳ ವಿವರಗಳನ್ನು ಪರಿಶೀಲಿಸಿ.
ಜಂಗಲ್ ಲಾಡ್ಜಸ್ & ರೆಸಾರ್ಟ್ಸ್ (ಮೈಸೂರಿನ ಸಮೀಪವಿರುವ ನಿಸರ್ಗ ಮತ್ತು ವನ್ಯಜೀವಿ ತಂಗುದಾಣಗಳು)
ನಗರದ ಗದ್ದಲದಿಂದ ದೂರವಿದ್ದು, ಪ್ರಕೃತಿಯ ಮಡಿಲಿನಲ್ಲಿ ಪ್ರಶಾಂತವಾಗಿ ಸಮಯ ಕಳೆಯಲು ಬಯಸುವಿರಾ? ಮೈಸೂರಿನಿಂದ ಅಲ್ಪ ದೂರದಲ್ಲೇ ಇರುವ ಸರ್ಕಾರಿ ಸ್ವಾಮ್ಯದ ಈ ಪ್ರಸಿದ್ಧ ವನ್ಯಜೀವಿ ರೆಸಾರ್ಟ್‌ಗಳಲ್ಲಿ ನಿಮ್ಮ ತಂಗುವಿಕೆಯನ್ನು ಕಾಯ್ದಿರಿಸಿ:
- ಕಬಿನಿ ರಿವರ್ ಲಾಡ್ಜ್: ಕಬಿನಿ ಹಿನ್ನೀರಿನ ದಂಡೆಯ ಮೇಲಿದ್ದು, ವಿಶ್ವದ ಅತ್ಯುತ್ತಮ ವನ್ಯಜೀವಿ ರೆಸಾರ್ಟ್‌ಗಳಲ್ಲಿ ಒಂದಾಗಿ ಹೆಸರುವಾಸಿಯಾಗಿದೆ.
- ಬಂಡೀಪುರ ಸಫಾರಿ ಲಾಡ್ಜ್: ಬಂಡೀಪುರ ರಾಷ್ಟ್ರೀಯ ಉದ್ಯಾನವನದ ಗಡಿಯಲ್ಲಿದ್ದು, ವನ್ಯಜೀವಿ ಸಫಾರಿ ಆಸಕ್ತರಿಗೆ ಸೂಕ್ತ ತಾಣವಾಗಿದೆ.
- ಜೆಎಲ್‌ಆರ್ ಕಿಂಗ್ಸ್ ಸ್ಯಾಂಚುರಿ, ನಾಗರಹೊಳೆ: ರಾಜೀವ್ ಗಾಂಧಿ ರಾಷ್ಟ್ರೀಯ ಉದ್ಯಾನವನದ (ನಾಗರಹೊಳೆ) ಉತ್ತರ ಭಾಗದಲ್ಲಿದ್ದು, ಪರಿಸರ ಸ್ನೇಹಿ ವಾತಾವರಣವನ್ನು ಹೊಂದಿದೆ.
- ಜಂಗಲ್ ಲಾಡ್ಜಸ್ ಮತ್ತು ರೆಸಾರ್ಟ್‌: ಮೈಸೂರಿನ ಸಮೀಪವಿರುವ ಸರ್ಕಾರಿ ಅಧಿಕೃತ ವನ್ಯಜೀವಿ ಮತ್ತು ಇಕೋ-ರೆಸಾರ್ಟ್‌ಗಳ ಮಾಹಿತಿಗಾಗಿ ಜಂಗಲ್ ಲಾಡ್ಜಸ್ ಮತ್ತು ರೆಸಾರ್ಟ್‌ ಅಧಿಕೃತ ವೆಬ್ಸೈಟ್ ಗೆ ಭೇಟಿ ನೀಡಿ.
ಮೈಸೂರಿಗೆ ತಲುಪುವ ಮಾರ್ಗಗಳು
ಮೈಸೂರು ನಗರವು ದಕ್ಷಿಣ ಭಾರತದ ಪ್ರಮುಖ ನಗರಗಳೊಂದಿಗೆ ಉತ್ತಮ ಸಾರಿಗೆ ಸಂಪರ್ಕವನ್ನು ಹೊಂದಿದೆ:
- ವಿಮಾನ ಮಾರ್ಗ: ಮೈಸೂರು ವಿಮಾನ ನಿಲ್ದಾಣವು (MYQ) ಪ್ರಮುಖ ಪ್ರಾದೇಶಿಕ ನಗರಗಳೊಂದಿಗೆ ವಿಮಾನ ಸಂಪರ್ಕವನ್ನು ಹೊಂದಿದೆ. ಅಥವಾ ೧೭೦ ಕಿ.ಮೀ ದೂರದಲ್ಲಿರುವ ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ (BLR) ಆಗಮಿಸಿ, ಅಲ್ಲಿಂದ ರಸ್ತೆ ಅಥವಾ ರೈಲು ಮಾರ್ಗವಾಗಿ ಮೈಸೂರನ್ನು ತಲುಪಬಹುದು.
- ರೈಲು ಮಾರ್ಗ: ಮೈಸೂರು ಜಂಕ್ಷನ್ ರೈಲು ನಿಲ್ದಾಣವು (MYS) ಬೆಂಗಳೂರು, ಚೆನ್ನೈ ಮತ್ತು ಹೈದರಾಬಾದ್‌ನಂತಹ ಪ್ರಮುಖ ನಗರಗಳೊಂದಿಗೆ ನೇರ ಸಂಪರ್ಕ ಹೊಂದಿದೆ. ಬೆಂಗಳೂರಿನಿಂದ ಹೊರಡುವ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲುಗಳ ಮೂಲಕ ಎರಡೂವರೆ ಗಂಟೆಗಿಂತ ಕಡಿಮೆ ಅವಧಿಯಲ್ಲಿ ಮೈಸೂರನ್ನು ತಲುಪಬಹುದು.
- ರಸ್ತೆ ಮಾರ್ಗ: ೧೦ ಪಥಗಳ ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್‌ವೇ (ದಶಪಥ ರಸ್ತೆ) ಮೂಲಕ ಅತ್ಯಂತ ವೇಗವಾಗಿ ಪ್ರಯಾಣಿಸಬಹುದು. ಜೊತೆಗೆ, ಬೆಂಗಳೂರಿನಿಂದ ಪ್ರತಿ ಕೆಲವು ನಿಮಿಷಗಳಿಗೊಮ್ಮೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ (KSRTC) ಬಸ್ಸ್‌ಗಳು ಲಭ್ಯವಿರುತ್ತವೆ.
ಅಧಿಕೃತ ಕೆಎಸ್‌ಟಿಡಿಸಿ ಮೈಸೂರು ದಸರಾ ಪ್ಯಾಕೇಜ್‌ಗಳು
ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮವು (KSTDC) ಸುಲಭ ಮತ್ತು ಸುಸೂತ್ರ ಪ್ರಯಾಣಕ್ಕಾಗಿ ಪ್ರತ್ಯೇಕ ಬಸ್ ಪ್ರವಾಸ ಹಾಗೂ ಪ್ರೇಕ್ಷಣೀಯ ಸ್ಥಳಗಳ ವೀಕ್ಷಣಾ ಪ್ಯಾಕೇಜ್‌ಗಳನ್ನು ಒದಗಿಸುತ್ತದೆ:
- ಕೆಎಸ್‌ಟಿಡಿಸಿ ಮೈಸೂರು ಸಿಟಿ ಟೂರ್: ಬೆಂಗಳೂರಿನಿಂದ ಹೊರಡುವ ಎರಡು ದಿನಗಳ ಮಾರ್ಗದರ್ಶಿತ (Guided) ಪ್ರವಾಸ ಪ್ಯಾಕೇಜ್. ಇದು ಚಾಮುಂಡಿ ಬೆಟ್ಟ, ಮೈಸೂರು ಅರಮನೆ, ಸೇಂಟ್ ಫಿಲೋಮಿನಾ ಚರ್ಚ್ ಹಾಗೂ ವಿದ್ಯುತ್ ದೀಪಗಳಿಂದ ಜಗಮಗಿಸುವ ಕೆಆರ್‌ಎಸ್ ಬೃಂದಾವನ ಉದ್ಯಾನವನವನ್ನು ಒಳಗೊಂಡಿರುತ್ತದೆ.
- ಕೆಎಸ್‌ಟಿಡಿಸಿ ೧ ದಿನದ ಮೈಸೂರು ಪ್ರೇಕ್ಷಣೀಯ ಸ್ಥಳಗಳ ವೀಕ್ಷಣೆ (Sightseeing): ಶ್ರೀರಂಗಪಟ್ಟಣ, ಮೈಸೂರು ಮೃಗಾಲಯ, ಜಗನ್ಮೋಹನ ಕಲಾಶಾಲೆ (ಆರ್ಟ್ ಗ್ಯಾಲರಿ) ಹಾಗೂ ಮೈಸೂರು ಅರಮನೆಯನ್ನು ಒಳಗೊಂಡ ಸಮಗ್ರ ಸ್ಥಳೀಯ ಪ್ರವಾಸ ಕಾರ್ಯಕ್ರಮ.
- ಅಂಬಾರಿ ಡಬಲ್ ಡೆಕ್ಕರ್ ಪ್ಯಾಕೇಜ್ :ದೀಪಾಲಂಕಾರದಿಂದ ಕಂಗೊಳಿಸುವ ಪಾರಂಪರಿಕ ಕಟ್ಟಡಗಳು ಹಾಗೂ ಮೈಸೂರಿನ ಸೌಂದರ್ಯವನ್ನು ರಾತ್ರಿ ವೇಳೆ ಕಣ್ಣುಂಬಿಕೊಳ್ಳಲು ತೆರೆದ ಮೇಲ್ಛಾವಣಿಯ ಡಬಲ್ ಡೆಕ್ಕರ್ ಬಸ್ ಪ್ರವಾಸ.
- ಎಲ್ಲಾ ಕೆಎಸ್‌ಟಿಡಿಸಿ ಬಸ್ ಪ್ಯಾಕೇಜ್‌ಗಳನ್ನು ವೀಕ್ಷಿಸಿ: ಕರ್ನಾಟಕದಾದ್ಯಂತ ನಿಗಮವು ಒದಗಿಸುವ ಪ್ರಾದೇಶಿಕ ಹಾಗೂ ನಗರ ಪ್ರವಾಸ ಪ್ಯಾಕೇಜ್‌ಗಳ ಸಂಪೂರ್ಣ ಪಟ್ಟಿಯನ್ನು ಪರಿಶೀಲಿಸಿ.
ನಿಮ್ಮ ರಾಜಪ್ರವಾಸವನ್ನು ಇಂದೇ ಯೋಜಿಸಿ
ಮೈಸೂರು ದಸರಾ ಮಹೋತ್ಸವವು ಕರ್ನಾಟಕದ ಜೀವಂತ ಪರಂಪರೆ ಮತ್ತು ಸಾಂಸ್ಕೃತಿಕ ವೈಭವದ ಅನನ್ಯ ಆಚರಣೆಯಾಗಿದೆ. ಕಣ್ಣುಕೋರೈಸುವ ಪಾರಂಪರಿಕ ಮೆರವಣಿಗೆಗಳಿಂದ ಹಿಡಿದು ಜಗಮಗಿಸುವ ನಯನಮನೋಹರ ದೀಪಾಲಂಕಾರದವರೆಗೆ, ಮೈಸೂರು ದಸರಾ ಜೀವನಪರ್ಯಂತ ನೆನಪಿನಲ್ಲಿ ಉಳಿಯುವ ಸವಿನೆನಪುಗಳನ್ನು ನೀಡುತ್ತದೆ.
ಅಧಿಕೃತ ಗೋಲ್ಡ್ ಪಾಸ್‌ಗಳನ್ನು ಕಾಯ್ದಿರಿಸಲು, ಕಾರ್ಯಕ್ರಮಗಳ ವೇಳಾಪಟ್ಟಿಯನ್ನು ಪರಿಶೀಲಿಸಲು ಅಥವಾ ಪ್ರವಾಸ ಟಿಕೆಟ್‌ಗಳನ್ನು ಪಡೆಯಲು, ಸರ್ಕಾರದ ಅಧಿಕೃತ ಜಾಲತಾಣ ಮೈಸೂರುದಸರಾ ಗೆ ಭೇಟಿ ನೀಡಿ. ಈ ಅಕ್ಟೋಬರ್‌ನಲ್ಲಿ ಮೈಸೂರಿನ ರಾಜವೈಭವ ಹಾಗೂ ಆತಿಥ್ಯವನ್ನು ಅನುಭವಿಸಲು ನಿಮ್ಮ ತಂಗುದಾಣಗಳನ್ನು ಇಂದೇ ಮುಂಚಿತವಾಗಿ ಕಾಯ್ದಿರಿಸಿ!