ವಿಜಯಪುರದಲ್ಲಿ ನಡೆಯುವ **’ನವರಸಪುರ ಉತ್ಸವ’**ವು ಪ್ರಸಿದ್ಧ ಸಂಗೀತ ಮತ್ತು ಸಾಂಸ್ಕೃತಿಕ ಹಬ್ಬವಾಗಿದೆ. ಆದಿಲ್ ಶಾಹಿ ಅರಸರ ಕನಸಿನ ನಗರಿಯಾದ **’ನವರಸಪುರ’**ದ ಹೆಸರನ್ನು ಈ ಉತ್ಸವಕ್ಕೆ ಇಡಲಾಗಿದೆ. ಭವ್ಯವಾದ ಸ್ಮಾರಕಗಳ ಹಿನ್ನೆಲೆಯಲ್ಲಿ ನಡೆಯುವ ಈ ಉತ್ಸವವು, ಸಂಗೀತ ಪ್ರಿಯರನ್ನು ಮತ್ತು ಪ್ರವಾಸಿಗರನ್ನು ಭಾವಪೂರ್ಣ ಕಚೇರಿಗಳಿಗೆ (Soulful Concerts) ಆಹ್ವಾನಿಸುತ್ತದೆ.
ನಿಮಗೆ ತಿಳಿದಿದೆಯೇ?
- ಕಲೆ ಮತ್ತು ಸಂಗೀತಕ್ಕೆ ಸಮರ್ಪಿತವಾದ **”ನವರಸಗಳ ನಗರ”**ವನ್ನಾಗಿ (City of nine emotions) ನಿರ್ಮಿಸಲು ಇಬ್ರಾಹಿಂ ಆದಿಲ್ ಶಾ II ‘ನವರಸಪುರ’ವನ್ನು ಕಲ್ಪಿಸಿದ್ದನು.
- ಈ ಉತ್ಸವದಲ್ಲಿ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಮತ್ತು ತಾಳವಾದ್ಯದ ದಿಗ್ಗಜರು ಪ್ರದರ್ಶನ ನೀಡಿದ್ದಾರೆ.
- ರಾಜಮನೆತನದ ಸಂಗೀತ ಪರಂಪರೆಯನ್ನು ಪ್ರತಿಧ್ವನಿಸುವಂತೆ, ಐತಿಹಾಸಿಕ ‘ಸಂಗೀತ ಮಹಲ್’ (Sangeet Mahal) ಬಳಿ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತದೆ.
- ನವರಸಪುರ ಉತ್ಸವವನ್ನು ಉತ್ತರ ಕರ್ನಾಟಕದ ಹೆಮ್ಮೆಯ ಸಾಂಸ್ಕೃತಿಕ ಆಚರಣೆಗಳಲ್ಲಿ ಒಂದೆಂದು ಪರಿಗಣಿಸಲಾಗಿದೆ.
ಉತ್ಸವದ ಪ್ರಮುಖ ಆಕರ್ಷಣೆಗಳು
- ಅದ್ದೂರಿ ಉದ್ಘಾಟನೆ: ಸಾಂಸ್ಕೃತಿಕ ಮೆರವಣಿಗೆ ಮತ್ತು ದೀಪ ಬೆಳಗುವ ಮೂಲಕ ಸಂಜೆಯ ಕಾರ್ಯಕ್ರಮಗಳಿಗೆ ಚಾಲನೆ ನೀಡಲಾಗುತ್ತದೆ.
- ಶಾಸ್ತ್ರೀಯ ಸಂಗೀತ: ಪ್ರಸಿದ್ಧ ಮತ್ತು ಉದಯೋನ್ಮುಖ ಕಲಾವಿದರಿಂದ ಹಿಂದೂಸ್ತಾನಿ ಶಾಸ್ತ್ರೀಯ ಗಾಯನ ಮತ್ತು ವಾದ್ಯ ಸಂಗೀತ ಕಚೇರಿಗಳು.
- ಜುಗಲ್ಬಂದಿ: ದಖನ್ ಪ್ರಾಂತ್ಯದ ಲಯಬದ್ಧ ಶ್ರೀಮಂತಿಕೆಯನ್ನು ಪ್ರದರ್ಶಿಸುವ ತಾಳವಾದ್ಯ ಕಚೇರಿಗಳು ಮತ್ತು ಜುಗಲ್ಬಂದಿಗಳು.
- ಪಾರಂಪರಿಕ ನಡಿಗೆ (Heritage Walks): ಗೋಲ್ ಗುಮ್ಮಟ ಮತ್ತು ಇತರೆ ಆದಿಲ್ ಶಾಹಿ ಸ್ಮಾರಕಗಳಿಗೆ ಮಾರ್ಗದರ್ಶಕರೊಂದಿಗೆ ಭೇಟಿ ನೀಡುವ ಅವಕಾಶ.
- ಆಹಾರ ಮತ್ತು ಮಳಿಗೆಗಳು: ವಿಜಯಪುರ ಮತ್ತು ಸುತ್ತಮುತ್ತಲಿನ ಪ್ರದೇಶಗಳ ಸ್ಥಳೀಯ ಖಾದ್ಯಗಳು, ಜವಳಿ ಮತ್ತು ಕರಕುಶಲ ವಸ್ತುಗಳ ಪ್ರದರ್ಶನ ಹಾಗೂ ಮಾರಾಟ.
ದಿನಾಂಕ ಮತ್ತು ಸಮಯ
ನವರಸಪುರ ಉತ್ಸವವು ಸಾಮಾನ್ಯವಾಗಿ ಜನವರಿ ಮತ್ತು ಮಾರ್ಚ್ ನಡುವೆ (ಚಳಿಗಾಲದಲ್ಲಿ) 3 ದಿನಗಳ ಕಾಲ ನಡೆಯುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ಇದರ ಆಯೋಜನೆಯಲ್ಲಿ ಕೆಲವೊಮ್ಮೆ ವ್ಯತ್ಯಯ ಉಂಟಾಗಿರುವುದರಿಂದ, ಪ್ರವಾಸಿಗರು ಪ್ರವಾಸ ಯೋಜಿಸುವ ಮುನ್ನ ಇತ್ತೀಚಿನ ಪ್ರಕಟಣೆಗಳು, ದಿನಾಂಕ ಮತ್ತು ಸಂಗೀತ ಕಚೇರಿಗಳ ಸಮಯವನ್ನು ಖಚಿತಪಡಿಸಿಕೊಳ್ಳಲು ಕೋರಲಾಗಿದೆ.
ತಲುಪುವುದು ಹೇಗೆ?
ವಿಜಯಪುರವು ಬೆಂಗಳೂರಿನಿಂದ ಸುಮಾರು 530 ಕಿ.ಮೀ ದೂರದಲ್ಲಿದೆ. ಹುಬ್ಬಳ್ಳಿಯಿಂದ, ಬೆಳಗಾವಿ ಮತ್ತು ಸೊಲ್ಲಾಪುರದಿಂದ ಉತ್ತಮ ರಸ್ತೆ ಸಂಪರ್ಕವಿದೆ.
- ರೈಲು ಮೂಲಕ: ವಿಜಯಪುರ ರೈಲು ನಿಲ್ದಾಣವು ಬೆಂಗಳೂರು, ಮುಂಬೈ ಮತ್ತು ಹೈದರಾಬಾದ್ನಂತಹ ಪ್ರಮುಖ ನಗರಗಳೊಂದಿಗೆ ನೇರ ರೈಲು ಸಂಪರ್ಕವನ್ನು ಹೊಂದಿದೆ.
- ವಿಮಾನದ ಮೂಲಕ: ಹತ್ತಿರದ ವಿಮಾನ ನಿಲ್ದಾಣಗಳು ಹುಬ್ಬಳ್ಳಿ, ಬೆಳಗಾವಿ ಮತ್ತು ಹೈದರಾಬಾದ್ನಲ್ಲಿವೆ. ಅಲ್ಲಿಂದ ರಸ್ತೆ ಅಥವಾ ರೈಲು ಮೂಲಕ ವಿಜಯಪುರಕ್ಕೆ ತಲುಪಬಹುದು.
ಗಮನದಲ್ಲಿಡಬೇಕಾದ ಅಂಶಗಳು
- ಪ್ರಸ್ತುತ ಸಾಲಿನಲ್ಲಿ ಉತ್ಸವ ನಡೆಯುತ್ತಿದೆಯೇ ಮತ್ತು ಸಂಗೀತ ಕಚೇರಿಗಳ ವಿವರವಾದ ವೇಳಾಪಟ್ಟಿಯನ್ನು ಖಚಿತಪಡಿಸಿಕೊಳ್ಳಿ.
- ತೆರೆದ ಸ್ಥಳದಲ್ಲಿ ಕಾರ್ಯಕ್ರಮ ನಡೆಯುವುದರಿಂದ ಸಂಜೆ ತಂಗಾಳಿ ಇರಬಹುದು, ಹಗುರವಾದ ಬೆಚ್ಚಗಿನ ಬಟ್ಟೆ (Light layer) ಜೊತೆಯಲ್ಲಿರಲಿ.
- ಶಾಸ್ತ್ರೀಯ ಸಂಗೀತ ಕಚೇರಿಗಳ ಸಮಯದಲ್ಲಿ ಕಲಾವಿದರಿಗೆ ಮತ್ತು ರಸಿಕರಿಗೆ ಗೌರವ ಸೂಚಿಸಲು ದಯವಿಟ್ಟು ಮೌನ ಕಾಪಾಡಿ ಮತ್ತು ಮೊಬೈಲ್ ಫೋನ್ಗಳನ್ನು ‘ಸೈಲೆಂಟ್ ಮೋಡ್’ನಲ್ಲಿಡಿ.
- ಉತ್ಸವದ ರಾತ್ರಿಗಳಲ್ಲಿ ಸ್ಮಾರಕಗಳ ಬಳಿ ಸಂಚಾರ ಬದಲಾವಣೆಗಳಿರುತ್ತವೆ, ಇದಕ್ಕೆ ತಕ್ಕಂತೆ ಸಮಯ ಹೊಂದಿಸಿಕೊಳ್ಳಿ.
ಸಂಗೀತಮಯ ಯಾನವನ್ನು ಅನುಭವಿಸಿ ನವರಸಪುರ ಉತ್ಸವಕ್ಕಾಗಿ ವಿಜಯಪುರಕ್ಕೆ ಬನ್ನಿ. ವಿದ್ಯುತ್ ದೀಪಗಳಿಂದ ಅಲಂಕೃತಗೊಂಡ ಸ್ಮಾರಕಗಳ ನಡುವೆ, ಚಿರಂತನ ರಾಗಗಳು ಮತ್ತು ದಖನ್ ಸಂಸ್ಕೃತಿಯ ಸೊಗಡನ್ನು ಸವಿಯುತ್ತಾ ಅವಿಸ್ಮರಣೀಯ ವಾರಾಂತ್ಯವನ್ನು ಕಳೆಯಿರಿ!