ಸಂಸ್ಕೃತಿಯ ಜೀವಂತ ಅಭಿನಯ. ಕರ್ನಾಟಕವು ಕೇವಲ ನೋಡುವ ಸ್ಥಳವಲ್ಲ – ಅದು ನಿಮಗಾಗಿ ಅಭಿನಯಿಸುವ ರಂಗಭೂಮಿ.
ಬೆಟ್ಟ, ಕರಾವಳಿ, ಅರಣ್ಯ ಮತ್ತು ಪ್ರಾಚೀನ ಪಟ್ಟಣಗಳೆಲ್ಲೆಡೆ ಕರ್ನಾಟಕವು ಸ್ಪಂದಿಸುವ ಜೀವಂತ ಲಯವನ್ನು ಹೊಂದಿದೆ. ಶತಮಾನಗಳಿಂದ ರೂಪುಗೊಂಡ ಈ ಲಯವು ಸಮುದಾಯಗಳು, ಪವಿತ್ರ ಆಚರಣೆಗಳು ಮತ್ತು ಆಕರ್ಷಕ ಕಥೆಗಳನ್ನು ಬೆಸೆಯುತ್ತದೆ. ಇಲ್ಲಿ ನೃತ್ಯವು ಕೇವಲ ಪ್ರದರ್ಶನವಲ್ಲ; ಅದು ನೆಲ ಮತ್ತು ಜನರ ನಡುವಿನ ಪವಿತ್ರ ಸಾಮರಸ್ಯ, ಇದು ಕರ್ನಾಟಕ ಸಂಸ್ಕೃತಿಯ ಜೀವಂತ ಅಭಿವ್ಯಕ್ತಿ.
ನೀವು ಈ ಸಂಪ್ರದಾಯಗಳಲ್ಲಿ ಬೆಳೆದ ಸ್ಥಳೀಯರಾಗಿರಲಿ, ಸಾಂಸ್ಕೃತಿಕ ಆಳವನ್ನು ಅರಸುವ ಕುತೂಹಲಿ ಪ್ರವಾಸಿಗರಾಗಿರಲಿ, ಅಥವಾ ದಕ್ಷಿಣ ಭಾರತವನ್ನು ಮೊದಲ ಬಾರಿಗೆ ಅನ್ವೇಷಿಸುತ್ತಿರುವ ಅತಿಥಿಯಾಗಿರಲಿ, ರಾಜ್ಯದ ಈ ನೃತ್ಯ ಪರಂಪರೆಯು ನಿಮ್ಮನ್ನು ಸೆಳೆಯುತ್ತದೆ – ಆಕರ್ಷಕ ಬಣ್ಣ, ಚಲನಶೀಲ ಅಭಿನಯ ಮತ್ತು ಮರೆಯಲಾಗದ ನಿರೂಪಣೆಗಳ ಮೂಲಕ.
ಬನ್ನಿ, ಕಲೆಯ ಸಾರವನ್ನೇ ಉಸಿರಾಡುವ ಕರುನಾಡಿನ ಹೃದಯವನ್ನು ಸ್ಪರ್ಶಿಸೋಣ! ಈ ನೆಲದ ಸ್ಪರ್ಶ, ಸತ್ವ ಮತ್ತು ಚೈತನ್ಯವನ್ನು ಸಾರುವ ಹಾಗೂ ಕಲಾತ್ಮಕತೆಯನ್ನು ಪ್ರತಿಬಿಂಬಿಸುವ ಆರು ಸಾಂಪ್ರದಾಯಿಕ ನೃತ್ಯ ರೂಪಕಗಳನ್ನು ಕಾಣೋಣ.
೧. ಯಕ್ಷಗಾನ – ರಾತ್ರಿಯ ಮಡಿಲಲ್ಲಿ ಅರಳುವ ರಂಗಸೌಂದರ್ಯ
ಕರಾವಳಿಯ ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳಲ್ಲಿ ಜನಿಸಿದ ಯಕ್ಷಗಾನವು ನಮ್ಮ ನಾಡಿನ ಅತಿ ವಿಶಿಷ್ಟ ಕಲಾ ಪ್ರಕಾರಗಳಲ್ಲಿ ಅಗ್ರಗಣ್ಯ. ಯಕ್ಷಗಾನವು ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳ ಹೆಮ್ಮೆಯ ಕೊಡುಗೆ.
ಇದು ಕೇವಲ ದೃಶ್ಯ ಕಲೆಯಲ್ಲ. ರಾಮಾಯಣ, ಮಹಾಭಾರತ ಮತ್ತು ಸ್ಥಳೀಯ ಪುರಾಣಗಳ ಕಥಾನಕಗಳನ್ನು ನೃತ್ಯ, ನಾಟಕ, ಸಂಗೀತ ಮತ್ತು ಸಂಭಾಷಣೆಗಳೊಂದಿಗೆ ಬೆಸೆಯುವ ಅದ್ಭುತ ಸಮ್ಮಿಲನ. ಮುಸ್ಸಂಜೆಯಲ್ಲಿ ಆರಂಭವಾಗಿ ಇಡೀ ರಾತ್ರಿ ನಡೆಯುವ ಈ ಪ್ರದರ್ಶನವು ಬಣ್ಣದ ವೇಷಗಳು, ಕಿರೀಟಗಳು ಮತ್ತು ವಾದ್ಯಗಳ ಆರ್ಭಟದಿಂದ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸುತ್ತದೆ.
೨. ಡೊಳ್ಳು ಕುಣಿತ – ನೆಲದ ನಾದ, ಸಮೂಹ ಶಕ್ತಿಯ ಮಹಾನಿನಾದ
ಶಕ್ತಿ ಮತ್ತು ಸಾಮೂಹಿಕ ಸಂಭ್ರಮದ ಪ್ರತೀಕವಾದ ಡೊಳ್ಳು ಕುಣಿತವು, ರಾಜ್ಯದ ಮಧ್ಯ ಕರ್ನಾಟಕ ಪ್ರದೇಶದಲ್ಲಿ ವಿಶೇಷ ಜನಪ್ರಿಯತೆ ಗಳಿಸಿದೆ.
ಪ್ರದರ್ಶಕರು ತಮ್ಮ ಮೈಗೆ ಡೊಳ್ಳುಗಳನ್ನು ಕಟ್ಟಿಕೊಂಡು, ಲಯಬದ್ಧವಾದ ವಿನ್ಯಾಸಗಳಲ್ಲಿ ಕುಣಿಯುತ್ತಾರೆ. ಡೊಳ್ಳಿನ ಆಳವಾದ ನಿನಾದ, ನರ್ತಕರ ವೇಗದ ಚಲನೆ ಮತ್ತು ನಿಖರವಾದ ಹೆಜ್ಜೆಗಾರಿಕೆಯು ಉತ್ಸಾಹ ಮತ್ತು ಸಂಭ್ರಮದ ವಾತಾವರಣವನ್ನು ಸೃಷ್ಟಿಸುತ್ತದೆ. ಸಾಮಾನ್ಯವಾಗಿ ದೇವಸ್ಥಾನದ ಜಾತ್ರೆಗಳು, ಮೆರವಣಿಗೆಗಳು ಮತ್ತು ಮುಖ್ಯ ಸಮುದಾಯ ಸಭೆಗಳ ಸಂದರ್ಭದಲ್ಲಿ ಈ ನೃತ್ಯವು ಜೀವತಳೆಯುತ್ತದೆ. ಶಿಸ್ತು, ಬಲ ಮತ್ತು ಒಗ್ಗಟ್ಟಿನ ಭಾವವನ್ನು ಪ್ರತಿಬಿಂಬಿಸುವ ಡೊಳ್ಳು ಕುಣಿತವು ಕರ್ನಾಟಕದ ಬಹುತೇಕ ಜನಪದ ಕಲೆಗಳ ಆಧಾರ ಸ್ತಂಭವಾಗಿದೆ.
೩. ಕೊಡವ ನೃತ್ಯ – ಹಸಿರು ಮಣ್ಣಿನ ಆತ್ಮೀಯ ಗಾನ
ಹಚ್ಚ ಹಸಿರಿನ ಪಶ್ಚಿಮ ಘಟ್ಟಗಳ, ಮಂಜಿನಿಂದ ಆವೃತವಾದ ಕೊಡಗು (ಕೂರ್ಗ್) ನೆಲದಿಂದ ಹೊರಹೊಮ್ಮಿದ ಕಲೆ ಈ ಕೊಡವ ನೃತ್ಯ. ಕೊಡವ ಜನಾಂಗದ ವಿಶಿಷ್ಟ ಸಂಪ್ರದಾಯಗಳು ಮತ್ತು ಸಮುದಾಯ ಜೀವನವನ್ನು ಪ್ರತಿಬಿಂಬಿಸುತ್ತದೆ.
ಈ ಗಂಭೀರ ಮತ್ತು ಸಾಮರಸ್ಯದ ನೃತ್ಯಗಳನ್ನು ಕೈಲ್ ಪೋದು , ಕಾವೇರಿ ಸಂಕ್ರಮಣ ಮತ್ತು ಪುತ್ತರಿ (ಕೊಯ್ಲು ಹಬ್ಬ) ಯಂತಹ ಪ್ರಮುಖ ಹಬ್ಬಗಳ ಸಂದರ್ಭದಲ್ಲಿ ಪ್ರದರ್ಶಿಸಲಾಗುತ್ತದೆ. ಕೊಡವ ನೃತ್ಯಗಳು ಸರಳ ಮತ್ತು ಸುಂದರವಾಗಿದ್ದು. ಸಮುದಾಯ ಬಾಂಧವ್ಯ ಮತ್ತು ಪೂರ್ವಜರ ಮೇಲಿನ ಗೌರವದ ಭಾವನೆಗಳನ್ನು ಇವು ಎತ್ತಿ ತೋರಿಸುತ್ತವೆ. ತಮ್ಮ ನೆಲ, ತಮ್ಮ ಹೆಮ್ಮೆ ಮತ್ತು ಒಗ್ಗಟ್ಟಿನಲ್ಲಿ ಆಳವಾಗಿ ಬೇರೂರಿರುವ ಕೊಡವ ಸಂಸ್ಕೃತಿಯ ಸಾರವನ್ನು ಈ ನೃತ್ಯಗಳು ಸುಸಂಸ್ಕೃತವಾಗಿ ಹೇಳುತ್ತವೆ ಹಾಗೂ ಕೊಡವ ಸಮುದಾಯದ ಆತ್ಮವನ್ನು ಈ ನೃತ್ಯಗಳು ಅನಾವರಣಗೊಳಿಸುತ್ತವೆ.
೪. ಕಂಸಾಳೆ – ಭಕ್ತಿಯ ಲಯದೊಳು ಮಹದೇಶ್ವರನ ದರ್ಶನ
ಕಂಸಾಳೆಯು ಮೈಸೂರು ಮತ್ತು ಚಾಮರಾಜನಗರ ಪ್ರದೇಶಗಳಲ್ಲಿ ನೆಲೆಸಿರುವ, ಮಹದೇಶ್ವರ ಸ್ವಾಮಿಯ ಆರಾಧನೆಗೆ ಮೀಸಲಾದ ಒಂದು ಪವಿತ್ರ ಜಾನಪದ ಕಲೆಯಾಗಿದೆ.
ಪ್ರದರ್ಶಕರು ಕಂಸಾಳೆ ಎಂಬ ತಾಳದಂತಹ ವಾದ್ಯಗಳನ್ನು ಜೋಡಿಯಾಗಿ ಹಿಡಿದು, ಅದನ್ನು ನೃತ್ಯದ ಚಲನೆಗಳಿಗೆ ಅನುಗುಣವಾಗಿ ಲಯಬದ್ಧವಾಗಿ ನುಡಿಸುತ್ತಾರೆ. ಸಾಂಪ್ರದಾಯಿಕವಾಗಿ, ‘ದೇವರಗುಡ್ಡರು’ ಎಂದು ಕರೆಯಲ್ಪಡುವ ಈ ಕಲಾವಿದರು, ನೃತ್ಯವನ್ನು ದೈವಕ್ಕೆ ಅರ್ಪಿಸುವ ಪವಿತ್ರ ಸೇವೆಯೆಂದು ಪರಿಗಣಿಸಿ ಕಠಿಣ ಶಿಸ್ತಿನ ತರಬೇತಿಯನ್ನು ಪಡೆಯುತ್ತಾರೆ. ಸಾಮಾನ್ಯವಾಗಿ ಕೇಸರಿ ಮತ್ತು ಹಳದಿ ಬಣ್ಣಗಳ ವಸ್ತ್ರಗಳನ್ನು ಧರಿಸುವುದು ಅವರ ಆಧ್ಯಾತ್ಮಿಕ ಬದ್ಧತೆಯನ್ನು ಸೂಚಿಸುತ್ತದೆ. ತೀರ್ಥಯಾತ್ರಾ ಸಂದರ್ಭಗಳು ಮತ್ತು ಧಾರ್ಮಿಕ ಮೆರವಣಿಗೆಗಳಲ್ಲಿ ಇಂದಿಗೂ ಪ್ರದರ್ಶನಗೊಳ್ಳುವ ಕಂಸಾಳೆಯು, ಕರ್ನಾಟಕದ ಆಧ್ಯಾತ್ಮಿಕ ಪರಂಪರೆಯ ಮುಖ್ಯ ಅಂಶವನ್ನು ಉಳಿಸಿಕೊಂಡಿದೆ.
೫. ಹುಲಿ ವೇಷ / ಪಿಲಿ ನಲಿಕೆ – ಕಡಲತೀರದ ಉತ್ಸವ
ಹುಲಿ ವೇಷ’ – ಕರಾವಳಿ ಜಿಲ್ಲೆಗಳಲ್ಲಿ ಜನಪ್ರಿಯವಾಗಿರುವ, ಅತ್ಯಂತ ಶಕ್ತಿಯಿಂದ ಕೂಡಿದ ಜನಪದ ನೃತ್ಯವಾಗಿದೆ. ಇದನ್ನು ಪಿಲಿ ನಲಿಕೆ ಎಂದೂ ಕರೆಯುತ್ತಾರೆ.
ಇದನ್ನು ಹೆಚ್ಚಾಗಿ ನವರಾತ್ರಿ ಸಂದರ್ಭದಲ್ಲಿ, ಅದರಲ್ಲೂ ವಿಶೇಷವಾಗಿ ಮಂಗಳೂರು ದಸರಾ ಸಂಭ್ರಮದ ಭಾಗವಾಗಿ ಪ್ರದರ್ಶಿಸಲಾಗುತ್ತದೆ. ಕಲಾವಿದರು ತಮ್ಮ ದೇಹದ ಮೇಲೆ ಹುಲಿಯಂತಹ ಸಂಕೀರ್ಣ ವಿನ್ಯಾಸಗಳನ್ನು ಮೂಡಿಸಲು ಹಲವು ಗಂಟೆಗಳನ್ನು ಕಳೆಯುತ್ತಾರೆ. ಜೋರಾದ ಡ್ರಮ್ಗಳು ಮತ್ತು ಸಾಂಪ್ರದಾಯಿಕ ಸಂಗೀತದ ಜೊತೆಯಲ್ಲಿ ನಡೆಯುವ ಈ ನೃತ್ಯವು ಉತ್ಸಾಹಭರಿತ, ಸಾಹಸಮಯ ಮತ್ತು ಸಂಪೂರ್ಣವಾಗಿ ಸಮುದಾಯದಿಂದ ಪ್ರೇರಿತವಾಗಿರುತ್ತದೆ. ಹುಲಿ ವೇಷವು ಧೈರ್ಯ ಮತ್ತು ಹಬ್ಬದ ಮನೋಭಾವವನ್ನು ಸಂಕೇತಿಸುತ್ತದೆ, ಇದು ಕರಾವಳಿ ಕರ್ನಾಟಕದ ಸಾಂಸ್ಕೃತಿಕ ಗುರುತಿನ ಅವಿಭಾಜ್ಯ ಅಂಗವಾಗಿದೆ.
೬ . ಸೋಮನ ಕುಣಿತ – ದೈವ ಸಂಚಾರದ ಮೌನ ನೃತ್ಯ
ಸೋಮನ ಕುಣಿತವು ದಕ್ಷಿಣ ಕರ್ನಾಟಕದ ಮಂಡ್ಯ, ಮೈಸೂರು ಮತ್ತು ಹಾಸನದಂತಹ ಪ್ರದೇಶಗಳಲ್ಲಿ ಪ್ರಚಲಿತವಿರುವ ಒಂದು ವಿಶಿಷ್ಟ ಧಾರ್ಮಿಕ ನೃತ್ಯ. ಇದು ನಿರ್ದಿಷ್ಟವಾಗಿ ಗ್ರಾಮ ದೇವತೆಗಳ ಆರಾಧನೆಯೊಂದಿಗೆ ಸಂಬಂಧ ಹೊಂದಿದೆ.
ಈ ನೃತ್ಯದ ಮುಖ್ಯ ಆಕರ್ಷಣೆ ಮತ್ತು ಗುರುತು, ‘ಸೋಮ’ ಎಂದು ಕರೆಯಲ್ಪಡುವ ದೊಡ್ಡ, ವರ್ಣರಂಜಿತ ಮುಖವಾಡಗಳು. ಪ್ರತಿಯೊಂದು ಮುಖವಾಡವು ಒಂದು ದೇವತೆ ಅಥವಾ ಆತ್ಮವನ್ನು ಪ್ರತಿನಿಧಿಸುತ್ತದೆ. ಅದನ್ನು ಧರಿಸಿದ ನರ್ತಕನು ಆಚರಣೆಯ ಸಮಯದಲ್ಲಿ ದೈವದ ಅಸ್ತಿತ್ವವನ್ನು ಮೈಗೂಡಿಸಿಕೊಂಡಿದ್ದಾನೆ ಎಂದು ನಂಬಲಾಗುತ್ತದೆ. ನೃತ್ಯದ ಚಲನೆಗಳು ಉದ್ದೇಶಪೂರ್ವಕ ಮತ್ತು ವಿಧ್ಯುಕ್ತವಾಗಿದ್ದು, ಜಾನಪದ ವಾದ್ಯಗಳ ಸಹಕಾರದೊಂದಿಗೆ ಆಧ್ಯಾತ್ಮಿಕ ವಾತಾವರಣವನ್ನು ಹೆಚ್ಚಿಸುತ್ತವೆ. ಸೋಮನ ಕುಣಿತವು ಕರ್ನಾಟಕದ ಸಮುದಾಯ ಆಚರಣೆಗಳ ಶ್ರೀಮಂತ ಸಂಪ್ರದಾಯವನ್ನು ಪ್ರತಿಬಿಂಬಿಸುತ್ತದೆ, ಗ್ರಾಮೀಣ ಜೀವನವನ್ನು ಶತಮಾನಗಳಿಂದ ರೂಪಿಸಿದ ನಂಬಿಕೆಗಳನ್ನು ಸಂರಕ್ಷಿಸುತ್ತದೆ.
ಇಂದಿಗೂ ಈ ನೃತ್ಯಗಳು ಏಕೆ ಮುಖ್ಯ?
ಕರ್ನಾಟಕದ ಈ ನೃತ್ಯ ಸಂಪ್ರದಾಯಗಳು ಕೇವಲ ಭೂತಕಾಲದ ಅವಶೇಷಗಳಲ್ಲ. ಅವು ಸಾಂಸ್ಕೃತಿಕ ನೆನಪುಗಳನ್ನು ಕಾಪಾಡಿಕೊಂಡು, ನಿರಂತರವಾಗಿ ವಿಕಸನಗೊಳ್ಳುತ್ತಿರುವ ಜೀವಂತ ಅಭ್ಯಾಸಗಳು. ಪ್ರತಿಯೊಂದು ಕಲೆಯು ಅದನ್ನು ಪೋಷಿಸಿದ ವೈವಿಧ್ಯಮಯ ಸಮುದಾಯಗಳ ವಿಶಿಷ್ಟ ಕಥೆಗಳು, ಮೌಲ್ಯಗಳು ಮತ್ತು ಗುರುತುಗಳನ್ನು ಪ್ರತಿಬಿಂಬಿಸುತ್ತದೆ.
ವೇಗದ ಬದಲಾವಣೆಯ ಈ ಯುಗದಲ್ಲಿ, ಈ ಸಂಪ್ರದಾಯಗಳು ಒಂದು ನಿರಂತರತೆಯನ್ನು ನೀಡುತ್ತವೆ—ಹಂಚಿಕೆಯಾದ ಪರಂಪರೆಯ ಶ್ರೀಮಂತಿಕೆ, ಸಾಮೂಹಿಕ ಆಚರಣೆಯ ಮಹತ್ವ ಮತ್ತು ಮಾನವ ಕಲಾತ್ಮಕ ಅಭಿವ್ಯಕ್ತಿಯ ಶಾಶ್ವತ ಶಕ್ತಿಯನ್ನು ನಮಗೆ ನೆನಪಿಸುತ್ತವೆ.
ಲಯ ಮತ್ತು ಬಣ್ಣದಲ್ಲಿ ಕರುನಾಡಿನ ಪಯಣ
ಪಶ್ಚಿಮ ಘಟ್ಟ, ಕರಾವಳಿ, ಬಯಲುಸೀಮೆ ಮತ್ತು ರಾಜ್ಯದ ಐತಿಹಾಸಿಕ ಹೃದಯಭಾಗಗಳಲ್ಲೆಡೆ, ನೃತ್ಯವು ಕರ್ನಾಟಕದ ಅನೇಕ ಲೋಕಗಳನ್ನು ಜೋಡಿಸುವ ಒಂದು ರೋಮಾಂಚಕ ಎಳೆಯಾಗಿದೆ.
ನೀವು ಅದರ ಹಳ್ಳಿಗಳು ಮತ್ತು ನಗರಗಳ ಮೂಲಕ ಪ್ರಯಾಣಿಸುವಾಗ, ಈ ಕಲಾ ಪ್ರಕಾರಗಳು ಸಾಂಸ್ಕೃತಿಕ ಸಂಗಾತಿಗಳಾಗಿ ನಿಮ್ಮೊಂದಿಗೆ ಸಾಗುತ್ತವೆ—ಪ್ರತಿಯೊಂದೂ ಅವುಗಳನ್ನು ರೂಪಿಸಿದ ಕಥೆಗಳಿಗೆ ಒಂದು ಆಳವಾದ ಕಿಟಕಿಯನ್ನು ತೆರೆಯುತ್ತವೆ.
ಕರ್ನಾಟಕದ ಈ ಸಾಂಪ್ರದಾಯಿಕ ನೃತ್ಯಗಳನ್ನು ನೋಡುವುದು ಎಂದರೆ, ಅದರ ಜನರು, ಹಬ್ಬಗಳು ಮತ್ತು ಶಾಶ್ವತ, ಭವ್ಯ ಸಂಪ್ರದಾಯಗಳ ಮೂಲಕ ರಾಜ್ಯವನ್ನೇ ಅನುಭವಿಸುವುದು ಎಂದರ್ಥ.
ನಿಮ್ಮ ಸಾಂಸ್ಕೃತಿಕ ಪಯಣಕ್ಕೆ ಯೋಜನೆ ರೂಪಿಸಿ!
- ಹೋಗಲು ಸೂಕ್ತ ಸಮಯ: ಕರಾವಳಿ ಮತ್ತು ಮೈಸೂರು ಪ್ರದೇಶಗಳಲ್ಲಿ ಯಕ್ಷಗಾನ ಮತ್ತು ಹುಲಿ ವೇಷದ ಅದ್ಭುತ ಪ್ರದರ್ಶನಗಳನ್ನು ನೋಡಲು ನಿಮ್ಮ ಪ್ರವಾಸವನ್ನು ನವರಾತ್ರಿ/ದಸರಾ ಹಬ್ಬದ (ಸಾಮಾನ್ಯವಾಗಿ ಸೆಪ್ಟೆಂಬರ್/ಅಕ್ಟೋಬರ್) ಸುತ್ತ ಯೋಜಿಸಿ.
- ಆಳವಾದ ಅನುಭವಕ್ಕೆ: ಡೊಳ್ಳು ಕುಣಿತ ಅಥವಾ ಸೋಮನ ಕುಣಿತವನ್ನು ಹತ್ತಿರದಿಂದ ನೋಡಲು, ಮುಂಬರುವ ದೇವಾಲಯದ ಜಾತ್ರೆಗಳ ಬಗ್ಗೆ ಸ್ಥಳೀಯರನ್ನು ವಿಚಾರಿಸಿ.
ಈ ಎಲ್ಲಾ ಕರ್ನಾಟಕದ ಜಾನಪದ ನೃತ್ಯಗಳಲ್ಲಿ, ನೀವು ಯಾವುದನ್ನು ನೋಡಲು ಹೆಚ್ಚು ಉತ್ಸುಕರಾಗಿದ್ದೀರಿ? ಕಾಮೆಂಟ್ಗಳಲ್ಲಿ ನಮಗೆ ತಿಳಿಸಿ!