ಕರ್ನಾಟಕದಲ್ಲಿ 7 ದಿನಗಳ ಪ್ರವಾಸ
ಕರ್ನಾಟಕದ ಬಗ್ಗೆ
ದಕ್ಷಿಣ ಭಾರತದ ಪ್ರವಾಸ ಎಂದಾಕ್ಷಣ ನಮ್ಮ ಮನಸ್ಸಿಗೆ ಸಾಮಾನ್ಯವಾಗಿ ಬರುವುದು ಅಲ್ಲಿನ ಪುರಾತನ ದೇವಾಲಯಗಳು ಮತ್ತು ಶ್ರೀಮಂತ ಪರಂಪರೆ. ಇದು ನಿಜ ಕೂಡ. ಆದರೆ, ಕರ್ನಾಟಕದಲ್ಲಿ ಕೇವಲ ದೇವಾಲಯಗಳಷ್ಟೇ ಅಲ್ಲ, ಅದಕ್ಕಿಂತಲೂ ಹೆಚ್ಚಿನದನ್ನು ನೋಡಬಹುದು. ಅದ್ಭುತ ಇತಿಹಾಸ, ಸ್ಮಾರಕಗಳಲ್ಲಿನ ಸೂಕ್ಷ್ಮ ಕೆತ್ತನೆಗಳು, ವಾಸ್ತುಶಿಲ್ಪ, ವನ್ಯಜೀವಿ ಸಂಪತ್ತು ಮತ್ತು ಸಾಹಸ ಚಟುವಟಿಕೆಗಳನ್ನು ಅನ್ವೇಷಿಸಲು ಪ್ರಪಂಚದಾದ್ಯಂತದ ಪ್ರವಾಸಿಗರು ಇಲ್ಲಿಗೆ ಭೇಟಿ ನೀಡುತ್ತಾರೆ. ಎಲ್ಲಾ ವರ್ಗದ ಪ್ರವಾಸಿಗರಿಗೂ ಕರ್ನಾಟಕವು ಅಚ್ಚುಮೆಚ್ಚಿನ ತಾಣವಾಗಿದೆ.
ಪ್ರವಾಸದ ಯೋಜನೆ
ಕರ್ನಾಟಕ ಪ್ರವಾಸಕ್ಕೆ ಯಾವುದು ಸೂಕ್ತವಾದ ಯೋಜನೆ ಅಥವಾ ‘ಐಟಿನರಿ’ (Itinerary) ಎಂದು ಅನೇಕರು ಕೇಳುತ್ತಾರೆ. ಸತ್ಯವೇನೆಂದರೆ, ಕರ್ನಾಟಕದ ವೈವಿಧ್ಯಮಯ ತಾಣಗಳನ್ನು ನೋಡಲು ಎಷ್ಟೇ ದಿನಗಳಿದ್ದರೂ ಸಾಲದು. ಆದರೂ, ನೀವು ಮೊದಲ ಬಾರಿಗೆ ರಾಜ್ಯಕ್ಕೆ ಭೇಟಿ ನೀಡುತ್ತಿದ್ದರೆ ಅಥವಾ ಪ್ರಮುಖ ಸ್ಥಳಗಳನ್ನು ನೋಡಲು ಬಯಸುವುದಾದರೆ, ಇಲ್ಲಿ ನೀಡಲಾಗಿರುವ ‘7 ದಿನಗಳ ಪ್ರವಾಸ ಯೋಜನೆ’ಯನ್ನು ಅನುಸರಿಸಬಹುದು. ನಿಮ್ಮ ಸಮಯದ ಲಭ್ಯತೆಗೆ ಅನುಗುಣವಾಗಿ ಈ ಯೋಜನೆಯಲ್ಲಿ ಹೆಚ್ಚಿನ ಸ್ಥಳಗಳನ್ನು ಸೇರಿಸಿಕೊಳ್ಳಬಹುದು.
“ಒಂದೇ ರಾಜ್ಯ, ಹಲವು ಜಗತ್ತುಗಳು” ಎಂಬ ಖ್ಯಾತಿಯ ಕರ್ನಾಟಕದಲ್ಲಿ ಪ್ರತಿಯೊಬ್ಬ ಪ್ರವಾಸಿಗನಿಗೂ ಇಷ್ಟವಾಗುವಂತಹ ತಾಣಗಳಿವೆ. ಇಡೀ ರಾಜ್ಯವನ್ನು ಸುತ್ತಲು ಒಂದು ವಾರ ಸಾಲದು, ಆದರೆ ಪ್ರಮುಖ ಮತ್ತು ನೋಡಲೇಬೇಕಾದ ಸ್ಥಳಗಳನ್ನು ವೀಕ್ಷಿಸಲು ಈ ಯೋಜನೆಯು ಸಹಕಾರಿಯಾಗಿದೆ.
ಬೆಂಗಳೂರು ನಗರವು ರಸ್ತೆ, ರೈಲು ಮತ್ತು ವಿಮಾನದ ಮೂಲಕ ಉತ್ತಮ ಸಂಪರ್ಕವನ್ನು ಹೊಂದಿರುವುದರಿಂದ, ನಿಮ್ಮ ಪ್ರವಾಸವನ್ನು ಬೆಂಗಳೂರಿನಿಂದಲೇ ಪ್ರಾರಂಭಿಸುವುದು ಸೂಕ್ತ. ಈ ಕೆಳಗಿನ ಯೋಜನೆಯು ರಾಜ್ಯದ ವನ್ಯಜೀವಿ, ಪರಂಪರೆ ಮತ್ತು ಸಾಂಸ್ಕೃತಿಕ ತಾಣಗಳನ್ನು ಒಳಗೊಂಡಿದೆ.
ಕರ್ನಾಟಕದಲ್ಲಿ 7 ದಿನಗಳ ಪ್ರವಾಸ
ಸುಮಾರು 1600 ವರ್ಷಗಳ ಸುದೀರ್ಘ ಇತಿಹಾಸ, ಗತಿಸಿದ ಸಾಮ್ರಾಜ್ಯಗಳ ವೈಭವ, ಅಡಗಿರುವ ನಿಧಿಗಳು, ಶ್ರೀಮಂತ ಸಂಸ್ಕೃತಿ, ವಾಸ್ತುಶಿಲ್ಪ ಮತ್ತು ಕರಕುಶಲ ಕಲೆಯ ಸೊಬಗನ್ನು “ಒಂದೇ ರಾಜ್ಯ, ಹಲವು ಜಗತ್ತುಗಳು” ಎಂಬ ಖ್ಯಾತಿಯ ಕರ್ನಾಟಕದಲ್ಲಿ ಕಣ್ತುಂಬಿಕೊಳ್ಳಿ.
ದಿನ 1 – ಬಂಡೀಪುರ (ವನ್ಯಜೀವಿಗಳ ಲೋಕ)
ಬೆಂಗಳೂರಿನಿಂದ ಪ್ರಯಾಣ: ನಿಮ್ಮ ಪ್ರವಾಸವನ್ನು ಬೆಂಗಳೂರಿನಿಂದ ಆರಂಭಿಸಿ, ಪಾರಂಪರಿಕ ನಗರಿ ಮೈಸೂರು ಮಾರ್ಗವಾಗಿ ಬಂಡೀಪುರಕ್ಕೆ ತೆರಳಿ. ಈ ಹಾದಿಯಲ್ಲಿ ಕರ್ನಾಟಕದ ಶ್ರೀಮಂತ ಇತಿಹಾಸ ಮತ್ತು ಸಂಸ್ಕೃತಿಯ ಪರಿಚಯ ನಿಮಗಾಗುತ್ತದೆ. ದಟ್ಟವಾದ ಕಾಡಿನ ಮಧ್ಯೆ ಸಾಗುವಾಗ ಸಿಗುವ ರೋಮಾಂಚಕ ಅನುಭವವೇ ವಿಶಿಷ್ಟವಾದುದು.
ಸಫಾರಿ ಮತ್ತು ವನ್ಯಜೀವಿ ದರ್ಶನ: ಅರಣ್ಯದ ನಿಶ್ಯಬ್ದ ಮತ್ತು ಪಕ್ಷಿಗಳ ಇಂಪಾದ ಚಿಲಿಪಿಲಿ ಕಲರವ ನಿಮ್ಮ ಮನಸ್ಸಿಗೆ ನೆಮ್ಮದಿ ನೀಡುತ್ತದೆ. ಇಲ್ಲಿನ ಜಂಗಲ್ ಸಫಾರಿಯು ನಿಮಗೆ ಮರೆಯಲಾಗದ ಅನುಭವ ನೀಡುತ್ತದೆ. ಜಿಂಕೆಗಳ ಓಟ, ನವಿಲುಗಳ ನೃತ್ಯ, ನೀರಿನ ಮೂಲಗಳನ್ನು ಅರಸಿ ಬರುವ ಗಜಪಡೆ (ಆನೆಗಳ ಹಿಂಡು) ಮತ್ತು ಈ ಕಾಡಿನ ಮುಖ್ಯ ಆಕರ್ಷಣೆಯಾದ ‘ಹುಲಿ’ಯನ್ನು ಸೆರೆಹಿಡಿಯಲು ನಿಮ್ಮ ಕ್ಯಾಮೆರಾಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ.
ಬಂಡೀಪುರದಲ್ಲಿ ಕೇವಲ ಹುಲಿ ಮತ್ತು ಆನೆಗಳಲ್ಲದೆ, ಕರಡಿ (Sloth bears), ಮೊಸಳೆ, ಹೆಬ್ಬಾವು, ಕಾಡುಕೋಣ (Gaur), ನರಿ ಮತ್ತು ನಾಲ್ಕು ಕೊಂಬಿನ ಜಿಂಕೆಗಳನ್ನು ಸಹ ಕಾಣಬಹುದು. ಚುಕ್ಕೆ ಜಿಂಕೆ (Chital), ಕಡವೆ (Sambar) ಮತ್ತು ಹಾರುವ ಓತಿಯಂತಹ ವಿಶೇಷ ಜೀವಿಗಳಿಗೂ ಇದು ಆವಾಸಸ್ಥಾನವಾಗಿದೆ. ಪ್ರಕೃತಿ ಪ್ರಿಯರಿಗೆ ಇಲ್ಲಿ 200ಕ್ಕೂ ಹೆಚ್ಚು ಪ್ರಭೇದದ ಸ್ಥಳೀಯ ಮತ್ತು ವಲಸೆ ಪಕ್ಷಿಗಳನ್ನು ವೀಕ್ಷಿಸುವ ಅವಕಾಶವಿದೆ.
ವಾಸ್ತವ್ಯ: ಕಾಡಿನ ಮಧ್ಯೆ ಸುರಕ್ಷಿತ ಮತ್ತು ಆರಾಮದಾಯಕ ವಾಸ್ತವ್ಯಕ್ಕಾಗಿ ಕರ್ನಾಟಕ ಪ್ರವಾಸೋದ್ಯಮದ ‘ಜಂಗಲ್ ಲಾಡ್ಜಸ್ ಅಂಡ್ ರೆಸಾರ್ಟ್ಸ್’ ಅನ್ನು ಆಯ್ಕೆ ಮಾಡಿಕೊಳ್ಳುವುದು ಉತ್ತಮ.
ದೂರ ಮತ್ತು ಸಮಯ: ಬೆಂಗಳೂರಿನಿಂದ ಬಂಡೀಪುರಕ್ಕೆ ಸುಮಾರು 214 ಕಿ.ಮೀ ದೂರವಿದ್ದು, ತಲುಪಲು ಅಂದಾಜು 4.30 ಗಂಟೆ ಸಮಯ ಬೇಕಾಗುತ್ತದೆ.
ದಿನ 2 – ಮೈಸೂರು (ಪಾರಂಪರಿಕ ನಗರಿ)
ಮೈಸೂರು ಅರಮನೆ
ಬಂಡೀಪುರ ಅರಣ್ಯದ ಶಾಂತ ವಾತಾವರಣದಿಂದ ಹೊರಬಂದು, ಕರ್ನಾಟಕದ ಸಾಂಸ್ಕೃತಿಕ ರಾಜಧಾನಿ ಹಾಗೂ ಪ್ರವಾಸಿಗರ ಅಚ್ಚುಮೆಚ್ಚಿನ ತಾಣವಾದ ಮೈಸೂರಿಗೆ ಪ್ರಯಾಣ ಬೆಳೆಸಿ. ಈ ದಿನವು ಪರಂಪರೆ, ಸಂಸ್ಕೃತಿ, ದೇವಾಲಯಗಳು ಮತ್ತು ಸುಂದರ ಉದ್ಯಾನವನಗಳ ವೀಕ್ಷಣೆಗೆ ಮೀಸಲಾಗಿರುತ್ತದೆ.
ನೋಡಲೇಬೇಕಾದ ಸ್ಥಳಗಳು: 1912ರಲ್ಲಿ ನಿರ್ಮಿಸಲಾದ ಭವ್ಯವಾದ ‘ಅಂಬಾ ವಿಲಾಸ ಅರಮನೆ’ (ಮೈಸೂರು ಅರಮನೆ) ನೋಡುಗರನ್ನು ಮೂಕವಿಸ್ಮಿತರನ್ನಾಗಿಸುತ್ತದೆ. ಆಧುನಿಕ ಸೌಲಭ್ಯಗಳೊಂದಿಗೆ ನಿರ್ಮಿಸಲಾದ ಈ ಅರಮನೆಯ ಅದ್ಭುತ ವಾಸ್ತುಶಿಲ್ಪವು ರಾಜ್ಯದ ಶ್ರೀಮಂತ ಪರಂಪರೆಗೆ ಸಾಕ್ಷಿಯಾಗಿದೆ. ನಿಮ್ಮ ಪ್ರವಾಸದಲ್ಲಿ ನಾಡದೇವತೆ ನೆಲೆಸಿರುವ ಚಾಮುಂಡಿ ಬೆಟ್ಟ, ಐತಿಹಾಸಿಕ ಸೇಂಟ್ ಫಿಲೋಮಿನಾ ಚರ್ಚ್ (St. Philomena’s Church) ಮತ್ತು ಕಾವೇರಿ ನದಿಗೆ ಅಡ್ಡಲಾಗಿ ಕಟ್ಟಲಾದ ಕೃಷ್ಣರಾಜಸಾಗರ (KRS) ಅಣೆಕಟ್ಟು ಹಾಗೂ ಬೃಂದಾವನ ಉದ್ಯಾನವನಗಳನ್ನು ಸೇರಿಸಿಕೊಳ್ಳಲು ಮರೆಯದಿರಿ. ನಿಮಗೆ ಸಮಯವಿದ್ದರೆ, ದೇಶದ ಅತಿದೊಡ್ಡ ಮತ್ತು ಅತ್ಯಂತ ಹಳೆಯ ಮೃಗಾಲಯಗಳಲ್ಲಿ ಒಂದಾದ ‘ಮೈಸೂರು ಮೃಗಾಲಯ’ಕ್ಕೆ ಭೇಟಿ ನೀಡಬಹುದು.
ವಿಶೇಷ ಖಾದ್ಯಗಳು: ಮೈಸೂರಿಗೆ ಬಂದು ಇಲ್ಲಿನ ವಿಶ್ವವಿಖ್ಯಾತ ‘ಮೈಸೂರು ಮಸಾಲೆ ದೋಸೆ’ ಮತ್ತು ಬಾಯಲ್ಲಿಟ್ಟರೆ ಕರಗುವ ಸಿಹಿ ತಿಂಡಿ ‘ಮೈಸೂರು ಪಾಕ್’ ಸವಿಯದಿದ್ದರೆ ಪ್ರವಾಸ ಅಪೂರ್ಣವೆನಿಸುತ್ತದೆ. ಈ ರುಚಿಕರ ಖಾದ್ಯಗಳನ್ನು ಸವಿಯಲು ಮರೆಯದಿರಿ.
ದೂರ ಮತ್ತು ಸಮಯ: ಬಂಡೀಪುರದಿಂದ ಮೈಸೂರಿಗೆ ಸುಮಾರು 72 ಕಿ.ಮೀ ದೂರವಿದ್ದು, ತಲುಪಲು ಅಂದಾಜು 1.15 ರಿಂದ 1.30 ಗಂಟೆ ಸಮಯ ಹಿಡಿಯುತ್ತದೆ.
ದಿನ 3 – ಹಾಸನ (ಶಿಲ್ಪಕಲೆಗಳ ನೆಲೆವೀಡು)
ಶೆಟ್ಟಿಹಳ್ಳಿ ಚರ್ಚ್, ಹಾಸನ
ಸಮುದ್ರ ಮಟ್ಟದಿಂದ 934 ಮೀಟರ್ ಎತ್ತರದಲ್ಲಿರುವ ಹಾಸನ ನಗರವು, ಪುರಾತನ ಹೊಯ್ಸಳ ಸಾಮ್ರಾಜ್ಯದ ವೈಭವವನ್ನು ಸಾರುವ ಐತಿಹಾಸಿಕ ತಾಣವಾಗಿದೆ. ಬೇಲೂರು ಮತ್ತು ಹಳೆಬೀಡಿನ ದೇವಾಲಯಗಳು ಹೊಯ್ಸಳರ ವಾಸ್ತುಶಿಲ್ಪದ ಮೇರುಕೃತಿಗಳಾಗಿವೆ. ಬೇಲೂರಿನ ಚೆನ್ನಕೇಶವ ಮತ್ತು ಹಳೆಬೀಡಿನ ಹೊಯ್ಸಳೇಶ್ವರ ದೇವಾಲಯಗಳಲ್ಲಿ ರಾಮಾಯಣ, ಮಹಾಭಾರತ ಮತ್ತು ಪುರಾಣಗಳ ಕಥೆಗಳನ್ನು ಹೇಳುವ ಸೂಕ್ಷ್ಮ ಕೆತ್ತನೆಗಳನ್ನು ಕಂಡಾಗ ಪ್ರವಾಸಿಗರು ಮಂತ್ರಮುಗ್ಧರಾಗುವುದು ಖಂಡಿತ.
ಇಲ್ಲಿನ ಮತ್ತೊಂದು ಆಕರ್ಷಣೆಯೆಂದರೆ ‘ಶೆಟ್ಟಿಹಳ್ಳಿ ಚರ್ಚ್’. ಹೇಮಾವತಿ ನದಿಯ ಹಿನ್ನೀರಿನಲ್ಲಿ ಮುಳುಗುವ ಈ ಪಾಳುಬಿದ್ದ ಚರ್ಚ್ (Rosary Church), ತನ್ನ ವಿಶಿಷ್ಟ ಸೌಂದರ್ಯದಿಂದ ನೋಡುಗರನ್ನು ಬೆರಗುಗೊಳಿಸುತ್ತದೆ. ಇದಲ್ಲದೆ, ಜೈನರ ಪವಿತ್ರ ಕ್ಷೇತ್ರವಾದ ಶ್ರವಣಬೆಳಗೊಳಕ್ಕೆ ಭೇಟಿ ನೀಡಿ, ಸುಮಾರು 600ಕ್ಕೂ ಹೆಚ್ಚು ಮೆಟ್ಟಿಲುಗಳನ್ನು ಏರಿದರೆ, ವಿಶ್ವದ ಅತಿ ಎತ್ತರದ ಏಕಶಿಲಾ ಮೂರ್ತಿಯಾದ ಭಗವಾನ್ ಬಾಹುಬಲಿಯ (ಗೊಮ್ಮಟೇಶ್ವರ) ದರ್ಶನ ಪಡೆಯಬಹುದು.
ದೂರ ಮತ್ತು ಸಮಯ: ಮೈಸೂರಿನಿಂದ ಹಾಸನಕ್ಕೆ ಸುಮಾರು 112 ಕಿ.ಮೀ ದೂರವಿದ್ದು, ತಲುಪಲು ಅಂದಾಜು 2.30 ಗಂಟೆ ಸಮಯ ಹಿಡಿಯುತ್ತದೆ.
ದಿನ 4 – ಹೊಸಪೇಟೆ ಮತ್ತು ಹಂಪಿ (ವಿಜಯನಗರದ ವೈಭವ)
ವಾಸ್ತುಚಿತ್ರ ಕಲ್ಲಿನ ರಥ – ಹಂಪಿ
ಹೊಸಪೇಟೆಯು ಕರ್ನಾಟಕದ ಮತ್ತೊಂದು ಪಾರಂಪರಿಕ ಪಟ್ಟಣವಾಗಿದ್ದು, ಶ್ರೀಮಂತ ಸಂಸ್ಕೃತಿ ಮತ್ತು ಪುರಾತನ ಸ್ಮಾರಕಗಳಿಗೆ ಹೆ್ಸರುವಾಸಿಯಾಗಿದೆ. ತುಂಗಭದ್ರಾ ನದಿಯ ದಡದಲ್ಲಿರುವ ಹಂಪಿ, ‘ಯುನೆಸ್ಕೋ ವಿಶ್ವ ಪಾರಂಪರಿಕ ತಾಣ’ವಾಗಿದ್ದು (UNESCO World Heritage Site), ಈ ಭಾಗದ ಪ್ರಮುಖ ಆಕರ್ಷಣೆಯಾಗಿದೆ. ವಿಜಯನಗರ ಸಾಮ್ರಾಜ್ಯದ ಗತವೈಭವವನ್ನು ಸಾರುವ ಇಲ್ಲಿನ ಸ್ಮಾರಕಗಳು ಮತ್ತು ಅವಶೇಷಗಳು ಪ್ರವಾಸಿಗರನ್ನು ಬೆರಗುಗೊಳಿಸುತ್ತವೆ.
ವಿಶೇಷವಾಗಿ, ಹಂಪಿಯ ವಿಜಯ ವಿಠಲ ದೇವಾಲಯದ ಆವರಣದಲ್ಲಿರುವ ವಿಶ್ವವಿಖ್ಯಾತ ‘ಕಲ್ಲಿನ ರಥ’ (Stone Chariot) ಪ್ರವಾಸಿಗರು, ಸಂಶೋಧಕರು ಮತ್ತು ವಿದ್ಯಾರ್ಥಿಗಳನ್ನು ಅಯಸ್ಕಾಂತದಂತೆ ಸೆಳೆಯುತ್ತದೆ. ಹಂಪಿಯ ವಿರೂಪಾಕ್ಷ ದೇವಾಲಯ ಮತ್ತು ಇತರ ಸ್ಮಾರಕಗಳು ವಿಜಯನಗರ ಸಾಮ್ರಾಜ್ಯದ ಸಿರಿವಂತಿಕೆಗೆ ಸಾಕ್ಷಿಯಾಗಿ ನಿಂತಿವೆ.
ದೂರ ಮತ್ತು ಸಮಯ: ಹಾಸನದಿಂದ ಹೊಸಪೇಟೆಗೆ ಸುಮಾರು 310 ಕಿ.ಮೀ ದೂರವಿದ್ದು, ತಲುಪಲು ಅಂದಾಜು 6 ಗಂಟೆ ಸಮಯ ಬೇಕಾಗುತ್ತದೆ.
ದಿನ 5 – ಐಹೊಳೆ ಮತ್ತು ಪಟ್ಟದಕಲ್ಲು (ವಾಸ್ತುಶಿಲ್ಪದ ತೊಟ್ಟಿಲು)
ಪಟ್ಟದಕಲ್ಲು
ಈ ಎರಡೂ ತಾಣಗಳು ದ್ರಾವಿಡ ಮತ್ತು ಚಾಲುಕ್ಯ ವಾಸ್ತುಶಿಲ್ಪ ಶೈಲಿಯನ್ನು ಬಿಂಬಿಸುವ ಐತಿಹಾಸಿಕ ಕೇಂದ್ರಗಳಾಗಿವೆ. ಮಲಪ್ರಭಾ ನದಿಯ ದಡದಲ್ಲಿರುವ ಪಟ್ಟದಕಲ್ಲು, ‘ಯುನೆಸ್ಕೋ ವಿಶ್ವ ಪಾರಂಪರಿಕ ತಾಣ’ವಾಗಿದೆ. 7 ಮತ್ತು 8ನೇ ಶತಮಾನದಲ್ಲಿ ಚಾಲುಕ್ಯರು ನಿರ್ಮಿಸಿದ ಇಲ್ಲಿನ ದೇವಾಲಯಗಳು, ದ್ರಾವಿಡ ಮತ್ತು ನಾಗರ (ಉತ್ತರ ಭಾರತದ) ಶೈಲಿಯ ಸಮ್ಮಿಲನಕ್ಕೆ ಸಾಕ್ಷಿಯಾಗಿವೆ. ಇಲ್ಲಿನ ಸೂಕ್ಷ್ಮ ಕೆತ್ತನೆಗಳು ಭಾರತೀಯ ವಾಸ್ತುಶಿಲ್ಪದಲ್ಲಿ ವಿಶಿಷ್ಟ ಸ್ಥಾನ ಪಡೆದಿವೆ.
ಐಹೊಳೆ ಮಲಪ್ರಭಾ ನದಿಯ ದಡದಲ್ಲಿರುವ ಪ್ರಶಾಂತ ತಾಣವಾದ ಐಹೊಳೆಯನ್ನು ‘ಭಾರತೀಯ ದೇವಾಲಯ ವಾಸ್ತುಶಿಲ್ಪದ ತೊಟ್ಟಿಲು’ ಎಂದು ಕರೆಯಲಾಗುತ್ತದೆ. ಇಲ್ಲಿ ನೂರಾರು ದೇವಾಲಯಗಳಿವೆಯಾದರೂ, ದುರ್ಗಾ ದೇವಾಲಯವು ಅತ್ಯಂತ ಪ್ರಮುಖವಾದುದು. ಅರ್ಧಚಂದ್ರ ಆಕಾರದ ವಿನ್ಯಾಸ (Semi-circular apse) ಮತ್ತು ಎತ್ತರದ ಜಗುಲಿಯನ್ನು ಹೊಂದಿರುವ ಈ ದೇವಾಲಯವು ಐಹೊಳೆಯ ಪ್ರಮುಖ ಆಕರ್ಷಣೆಯಾಗಿದೆ.
ಇಲ್ಲಿನ ಇತರ ಪ್ರಮುಖ ತಾಣಗಳೆಂದರೆ ಲಾಡ್ ಖಾನ್ ದೇವಾಲಯ, ಸರ್ಪದ ಮೇಲೆ ಕುಳಿತಿರುವ ವಿಷ್ಣುವಿನ ಶಿಲ್ಪವಿರುವ ಹುಚ್ಚಿಮಳ್ಳಿ ದೇವಾಲಯ, ರಾವಳಫಡಿ ಗುಹಾಂತರ ದೇವಾಲಯ, ಉಮಾಮಹೇಶ್ವರಿ ದೇವಾಲಯ, ಬೌದ್ಧ ದೇವಾಲಯ, ಕೊಂತಿ ದೇವಾಲಯ ಸಮುಚ್ಚಯ ಮತ್ತು ಮೇಗುಟಿ ಜೈನ ದೇವಾಲಯ.
ದೂರ ಮತ್ತು ಸಮಯ:
ಪಟ್ಟದಕಲ್ಲಿನಿಂದ ಐಹೊಳೆಗೆ ಕೇವಲ 13 ಕಿ.ಮೀ ದೂರವಿದ್ದು, ಸುಮಾರು 20 ನಿಮಿಷಗಳಲ್ಲಿ ತಲುಪಬಹುದು.
ಹೊಸಪೇಟೆಯಿಂದ ಐಹೊಳೆಗೆ ಸುಮಾರು 125 ಕಿ.ಮೀ ದೂರವಿದ್ದು, ತಲುಪಲು ಅಂದಾಜು 2.30 ಗಂಟೆ ಸಮಯ ಬೇಕಾಗುತ್ತದೆ.
ದಿನ 6 – ಬದಾಮಿ (ಚಾಲುಕ್ಯರ ರಾಜಧಾನಿ)
ಬದಾಮಿ
ಪಟ್ಟದಕಲ್ಲಿನಿಂದ ಕೇವಲ 23 ಕಿ.ಮೀ ದೂರದಲ್ಲಿರುವ ಬದಾಮಿಯು ಐತಿಹಾಸಿಕವಾಗಿ ಬಹಳ ಪ್ರಮುಖವಾದ ತಾಣವಾಗಿದೆ. ಇಲ್ಲಿನ ಕಲ್ಲಿನ ಬಂಡೆಗಳು ಮತ್ತು ಅದ್ಭುತ ಶಿಲ್ಪಕಲೆಗಳು ಗತಕಾಲದ ವೈಭವದ ಕಥೆಗಳನ್ನು ಹೇಳುತ್ತವೆ. ಕೆಂಪು ಮರಳುಗಲ್ಲಿನ ಬಂಡೆಗಳಲ್ಲಿ ಕೊರೆದ ನಾಲ್ಕು ಗುಹಾಂತರ ದೇವಾಲಯಗಳಿಗೆ ಬದಾಮಿ ಪ್ರಸಿದ್ಧವಾಗಿದೆ. ಇಲ್ಲಿನ ಕಂಬಗಳು ಮತ್ತು ಬ್ರಾಕೆಟ್ ಶಿಲ್ಪಗಳ ಕೆತ್ತನೆಗಳು ಮನಮೋಹಕವಾಗಿವೆ.
ಇದು 7ನೇ ಶತಮಾನದಷ್ಟು ಹಳೆಯದಾಗಿದ್ದು, ನಂತರದ ಕಲ್ಯಾಣಿ ಚಾಲುಕ್ಯರ ಕಾಲದಲ್ಲಿ (11ನೇ ಶತಮಾನ) ಇದಕ್ಕೆ ಹೊರಗಿನ ಮಂಟಪವನ್ನು ಸೇರಿಸಲಾಯಿತು. ಅಗಸ್ತ್ಯ ತೀರ್ಥ ಕೆರೆಯ ದಡದಲ್ಲಿರುವ ಭೂತನಾಥ ದೇವಾಲಯವು ಪ್ರವಾಸಿಗರ ಪ್ರಮುಖ ಆಕರ್ಷಣೆಯಾಗಿದೆ. ಶಿವನ ಸ್ವರೂಪವಾದ ‘ಭೂತನಾಥ’ನಿಗೆ (ಜೀವಸಂಕುಲ ಮತ್ತು ಭೂತಗಣಗಳ ಒಡೆಯ) ಈ ದೇವಾಲಯವನ್ನು ಸಮರ್ಪಿಸಲಾಗಿದೆ.
ವಿಶೇಷ ಸಲಹೆ: ಬದಾಮಿ ಗುಹೆಗಳನ್ನು ವೀಕ್ಷಿಸಲು ಸೂರ್ಯಾಸ್ತದ ಸಮಯ (Golden Hour) ಅತ್ಯುತ್ತಮವಾದುದು. ಈ ಸಮಯದಲ್ಲಿ ಸೂರ್ಯನ ಕಿರಣಗಳು ಕೆಂಪು ಮರಳುಗಲ್ಲಿನ ಬಂಡೆಗಳ ಮೇಲೆ ಬಿದ್ದಾಗ, ಅವು ಬಂಗಾರದಂತೆ ಹೊಳೆಯುತ್ತವೆ.
ದೂರ ಮತ್ತು ಸಮಯ:
- ಪಟ್ಟದಕಲ್ಲಿನಿಂದ ಬದಾಮಿಗೆ 21 ಕಿ.ಮೀ ದೂರವಿದ್ದು, ಸುಮಾರು 30 ನಿಮಿಷಗಳಲ್ಲಿ ತಲುಪಬಹುದು.
- ಬದಾಮಿಯಿಂದ ಬೆಂಗಳೂರಿಗೆ 450 ಕಿ.ಮೀ ದೂರವಿದ್ದು, ತಲುಪಲು ಅಂದಾಜು 8.30 ಗಂಟೆ ಸಮಯ ಬೇಕಾಗುತ್ತದೆ. ನೀವು ರಾತ್ರಿಯ ರೈಲು ಅಥವಾ ಕೆ.ಎಸ್.ಆರ್.ಟಿ.ಸಿ (KSRTC) ಬಸ್ಗಳ ಮೂಲಕ ಬೆಂಗಳೂರಿಗೆ ಹಿಂತಿರುಗಬಹುದು.
ಕರ್ನಾಟಕದ ಶ್ರೀಮಂತ ಪರಂಪರೆ ಮತ್ತು ಸಂಸ್ಕೃತಿಯನ್ನು ಸಂಪೂರ್ಣವಾಗಿ ಅರಿಯಲು 7 ದಿನಗಳು ಸಾಲದು. ಆದರೂ, ಮೇಲೆ ನೀಡಲಾದ ಪ್ರವಾಸ ಯೋಜನೆಯು ರಾಜ್ಯದ ಪ್ರಮುಖ ಮತ್ತು ನೋಡಲೇಬೇಕಾದ ತಾಣಗಳ ಪರಿಚಯವನ್ನು ನಿಮಗೆ ಮಾಡಿಕೊಡುತ್ತದೆ. ಮುಂದಿನ ಬಾರಿ ನೀವು ಭೇಟಿ ನೀಡಿದಾಗ, ಕರ್ನಾಟಕದ ಸುಂದರ ಕಡಲತೀರಗಳು, ಮಂಜಿನಿಂದ ಆವೃತವಾದ ಗಿರಿಧಾಮಗಳು, ಸಾಹಸ ಕ್ರೀಡೆಗಳು ಮತ್ತು ವನ್ಯಜೀವಿ ತಾಣಗಳನ್ನು ಅನ್ವೇಷಿಸಬಹುದು.
ಕರ್ನಾಟಕಕ್ಕೆ ಮತ್ತೆ ಭೇಟಿ ನೀಡಿ, ಇಲ್ಲಿನ ಇನ್ನೂ ಅನೇಕ ಅದ್ಭುತಗಳನ್ನು ಕಣ್ತುಂಬಿಕೊಳ್ಳಿ.